Eurode
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Kirchröadsj, es te dit dialek sjpriks.
Eurode ies 'n symbolische "Europasjtad" die gevörmp weurt door de gemeinte Kèrkrao in Nederlands Limburg en de gemeinte Hertserao (Herzogenrath) in Duutsjland, allebei in de Euregio Maas-Rien. De formeel, publiekrechterleke samewèrking is mäögelek saer Het Verdrag van Anholt van 23 mei 1991. D'r weurt samegewèrk op economisch, sociaal en cultureel vlak. Saer 1998 besjteit 't Openbaar Lichaam Eurode, 'n raod mèt lede oet allebei de gemeintes ónder wiesselend veurzietersjap van de twiè börgemeistersj van de gemeintes.
Kèrkrao en Hertserao vörmde saer de 12e ièw 'n einheid ónder 't Land van Hertserao, in 't Land van Euvermaas. In 1815, bie 't Congres van Wene, woort Hertserao aan Duutsjland toegeweze en bleef Kèrkrao Nederlands. De Burch Rode kaom hiebie in Duutsjland te liegke en de abdij Rolduc in Nederland. De grens löp euver de Nieuwstraat/Neustraße.
De naam Eurode ies 'n samevoging van "Europa" en "Rode", wie 't Land van Hertserao en de Burch Rode ouch waal geneump woorte.