Eugène Dubois

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Eugène Dubois

Marie Eugène François Thomas Dubois (Èèsjde, 28 januari 1858 - Hale, 16 december 1940) waor 'ne Nederlandse anatoom en geoloog. Hae sjtudeerde mediciene in Amsterdam. In 1887 góng hae es militair arts nao Sumatra en later nao Java.

Hae zoch es ièrsjte geriech nao euverbliefsele van de veurouwersj van de miensj. Ièrder óntdèkkinge wie de Neanderthaler waore toeval gewaes. Hae waor d'r van euvertuug dat de oarsjpróng van de miensjelike soort in de trope moos liegke; daorum góng hae zeuke in Indonesië.

Dubois vóng in 1891 in Trinil op Java inderdaad botte en sjedelfragmente van de sjedel van - wat hae dach - 'n tösjevörm tösje aap en miensj, die hae Pithecanthropus erectus (bekènd es de "Javamiensj") neumde. Dubois dach dat hae 'ne belangrieke sjakel in de óntwiekkeling van miensjaap tot miensj houw gevónge, meh koes neet al zien collega's daovan euvertuge. Later woorte de door häöm gevónge fossiele ónder de Homo erectus gerekend.

Vanwege zien ergernis euver 't soms zelfs roondoet vijandig weitensjappelik debat euver zien vóndste in Indonesië begoes Dubois ziech toe te lègke op ander ónderzeuksgebejer. Vöral oonderzoch hae cefalisatie en dit waerk blaeëk naoderhaand bekaans zjuus zoe belangriek es d'r oontbraeëkende sjakel in de evolutie van d'r miensj dae e voonde how.[1] De fossiele bewaarde hae in zien hoes en leet hae geine miè zeen of ónderzeuke. In 1898 woort Dubois hoagleraar in de geologie, kristallografie, mineralogie en paleontologie aan de Universiteit van Amsterdam; vanaaf 1908 waor hae ouch professor in de fysische geografie. Pas in 1923 leet hae de fossiele van de Javamiensj weer aan de boetewaereld zeen.

Dubois sjtorf in 1940. Hae woort begrave in Venlo op oongewiejde groond. Zien verzameling ies es de Collectie Dubois óndergebrach in 't museum Naturalis in Leide.

Tentoonsjtèlling in Hale[bewirk | brón bewèrke]

In Hale is 'n tentoeënsjtèlling georganiseerd n.a.v. 150ste gebaoërtejaor.

Referentie[bewirk | brón bewèrke]

  1. Op zoek naar de missing link, Alan Walker en Pat Shipman ISBN 90-274-6428-6

Externe link[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Eugène_Dubois&oldid=433964"