Davide Rebellin

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Davide Rebellin (San Bonifacio, 9 augustus 1971 - 30 november 2022) waor 'ne Italiaanse fietserenner. Hae fietsde bie de ploog Serramenti PVC Diquigiovanni-Androni Giocattoli.

Rebellin woort profrenner in 1992. In 1996 wón hae 'n etappe in de Giro d'Italia en droog 6 daag de roze leidersjtrui. In 1997 wón hae de Clásica San Sebastián. In 2001 wón hae 't klassement en ein etappe van de Tirreno Adriatico.

Van 2002 tot 2008 fietsde hae bie Gerolsteiner. In 2004 wón hae de Amstel Gold Race, de Waalse Piel én Luuk-Bastenake-Luuk, binne ein week, es ièrsjte renner oats.

Rebellin wón in 2008 't klassement van Paries-Nice. Op de Olympische Sjpele in Peking in 2008 haolde hae 'n zilvere medaille op de weegrit. In april 2009 woort bekènd dat hae op dees Olympische Sjpele betrap ies op CERA, 'ne EPO-variant. Rebellin óntkènt dat hae doping haet gebruuk en haet um 'n contra-expertise gevraog.

Rebellin góng óndanks sjorsinge en anger taegesjleeg oetzungerlik lang door en haolde ouch es veertiger nog aansjpraekende rizzeltate. Pas in 2022, kort veur ziene 51e verjäördag, sjtopde hae mit fietsrenne. Zien carrière hauw daartig jaor gedoerd. Kort daonao, op 30 november, woort hae bie 'n training door 'ne vrachwage aangevare en sjtorf direk.