Naar inhoud springen

Costa Ricaons hierevoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Team vaan Costa Rica op 't WK vaan 2018.

't Costra Ricaons hierevoetbalèlftal vertreujt Costa Rica in internationaol voetbalmatche. 't Team is traditioneel 't sterkste team vaan Midde-Amerika. Op zien bèste meminte kin 't ziech mete mèt Mexico en de Vereinegde Staote, de twie toplen vaan Noord-Amerika. Costa Rica heet diverse kiere op 't WK voetbal gestande.

Historie[bewirk | brón bewèrke]

In 1921 organiseerde de Midde-Amerikaonse len 'n Iewfees vaan de Oonaofhenkelekheid, boebij ouch e voetbaltoernooj tösse de versjèllende len woort gehawwe. Hei maakde 't Costa Ricaons team zien debuut. Toen al domineerden 't land de regio: El Salvador woort mèt 7-0 geklop. In de jaore veerteg en viefteg waore ze 't twiede team vaan Noord-Amerika, nao Mexico. In 1946 woort Puerto Rico zelfs mèt 12-0 verslage.

Aon 't ind vaan de jaore zèsteg lepe de prestaties trök. Diverse aander len in de regio, zoewie ouch len in 't Caribische gebeed, kaome op. In de jaore zeventeg woort vaan 't team neet väöl gehuurd, tot 't team in 1989 de CONCACAF-cup won. Zoe plaotsde COsta Rica ziech ouch veur 't WK vaan 1990 in Italië. Hei kaom 't land tot de achste finaal. Veur de twie volgende WK's kós 't ziech neet plaotse. Ouch op de Copa América vaan 1997 - boe Costa Rica bij oetzundering veur woort oetgeneujd - kós ´t geinen indrök make. Op 't WK vaan 2002 en 2006 waor 't land weer presint, zoonder evels väöl indrök te make.

Nao 'n aofwezegheid in 2010 waore de Ticos op 't WK vaan 2014, nao 'n impressionante kwalificatie, in Brazilië weer trök. Hei wonne ze de sterk bezatte gróp (mèt Uruguay, Italië en Ingeland) en haolde ze de kwartfinaal, veural door negatief, hendeg verdeidegend voetbal. Oetindelek woorte ze nao penanties door Nederland oetgesjakeld. Ouch in 2018 kwalificeerde ze ziech euvertuigend; op 't WK zelf maakde ze evels minder indrök. De kwalificatie veur 't WK vaan 2022 in Qatar mós via play-offs gebäöre.