Cinema vaan Cyprus
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Cinema vaan Cyprus is de collectie films die zien gemaak en/of geproduceerd door lui aofkomsteg of woenechteg op 't eilaand Cyprus, dat officieel allewijl gaans en al besteit oet 't gelieknaomeg laand, meh in 't noorde in praktiek ouch besteit oet Noord-Cyprus. Zie betaomt ziech bis de tien kleinste cinema's vaan Europa. Allein de Cinema vaan Malta en de Cinema vaan Monaco zien kleiner. De veer dwergstaote Andorra, Liechtenstein, San Marino en 't Vatikaon staon alle veer op 'n gedeilte ierste plaots, sumpelweeg umtot ze de einegste len in 't continènt zien mèt überhaup geine cinema. De drei len mèt 'n get groetere cinema zien, vaan klein nao groeter, de Cinema vaan Zweitserland, de Cinema vaan Luxembörg en de Cinema vaan Kosovo. Heer betaomp ziech dèks bis de Griekstaolege cinema.
Financieel Cypriotisch
[bewirk | brón bewèrke]De mieste Cypriotische films zien mer deils-Cypriotisch, umtot ze 'n stök mètfinanciere. Bis de vreuge Einentwintigste iew waor Cyprus 'N ikkenomisch slum laand um films te producere, umtot 't bekind stoond es e belastingparadies. Door de mach vaan de EU begos dat vaanaof 2004 al minder te weure, meh veural de crisis heet vaanaof 2007 'n hendeg groet litteike achtergelaote op Cyprus' cinema. Cyprus heet veural dèks mèt geproduceerd aon Griekse films, meh ouch 't Vereineg Keuninkriek en Italië höbbe väöl te daanke aon Cypriotische studio's.
Cultureel Cypriotisch
[bewirk | brón bewèrke]Cypriotische films die daodwèrkelek geregisseerd zien door Cypriote, gespäöld zien door Cypriote en ziech in Cyprus aofspäöle zien d'r eigelek meh weineg. Films die Europees succes höbbe gehad zien zelfs op einen hand te tèlle. En ouch daan is 't edere kier allein in de Europese underground bis erkènning gekomme. De oorlogsfilm Kato apo t'astra (2001) is d'r eine en 't drama 't drama Fish n' Chips oet 2011 is e bekind veurbeeld. Wijer zien 't veural documentaires, meistens euver de Cypriotische börgeroorlog of de eurocrisis, die bekind zien gewore. Cyprus heet eigelek meh twie bekinde filmstare: de rezjissäör Michael Cacoyannis, dee mèt ziene Britse film Zobra the Greek oet 1964 hendeg populair woort in Europa en daonao in Griekeland góng hoje, en de compomis Nicolas Economou, dee vaanoet Dusseldörp meziek maakde veur hendeg bekinde films, wie Die Geduld der Rosa Luxemburg oet 1986.
Filmcultuur
[bewirk | brón bewèrke]'n Groet deil vaan de Cypriotische bevolking zal woersjijnlek, zjus wie in de res vaan Europa, häör veurkäör geve aon de Cinema vaan de Vereingde Staote vaan Amerika, meh ouch is, door historische reijes, de Cinema vaan 't Vereineg Keuninkriek hendeg populair. Wijer zien umwille vaan cultureel, taolköndeg reijes respectievelek de Cinema vaan Griekeland in 't zuie en de Cinema vaan Törkije in 't noorde populair. Es de eige cinema daan urges wel aondach krijg, is dat veurnaomelek in Griekeland. Films weure in Cyprus, zjus wie in de Bènelux, oondertiteld. Allein kinderfilms weure vertaold, meh daan meistens door Grieke, umtot 't veur synchronisatie gein ikkenemie gief in Cyprus. Ingelstaolege films weure evels dèks überhaup neet oondertiteld, umtot de Cypriote zoe good es ummertouw good Ingels praote en verstoon.