Canarische eilenj

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

---

Regio van Spanje Canarische Eilenj Islas Canarias
Hoofplaats	Santa Cruz de Tenerife en Las Palmas de Gran Canaria
Opperflaakde	7.493 km²
Inwoeners – Deechde	2.117.519 (2014) 280/km²
President	Fernando Clavijo Batlle
Vouksleed	Himno de Canarias
Taole	Spaons
ISO 3166-2	ES-CN
Website	www.gobcan.es

d'n Teide is de hoogste berg van Sjpanje.

De Canarische eilenj (Sjpaans: Islas Canarias [ˈizlas kaˈnaɾjas], locaal: [ˈiɦlah kaˈnaɾjah]) is 'n Sjpaanse archipel t'n zuudwèste van Marokko (100 kilomaeter t'n wèste van de zujelike grens). De Canarische eilenj zeen ein van de zeveteen autonoom gemeinsjappe van Sjpanje en is ouch ein van de wieds-eweg gelaege regio's van de Europese Unie. Ónger de eilenj valle (van groot nao klein): Tenerife, Fuerteventura, Gran Canaria, Lanzarote, La Palma, La Gomera, El Hierro, La Graciosa, Alegranza, Isla de Lobos, Montaña Clara en Roque del Oeste.

De sjtrenj, 't klimaat en de aantrèkkelike natuur, veural Maspalomas op Gran Canaria en Teide Nasjenaal Park en de berg Teide op Tenerife (de op twee nao hoogste vólkaan van de waereld gemaete vanaaf de voot ónger de oceaan), zörge d'rveur det de eilenj väöl toeriste trèkke (meer es 12 miljoen de jaor, veural op Tenerife, Fuerteventura, Gran Canaria en Lanzarote). De eilenj höbbe e subtropisch klimaat mit lang, heite zomers en gemaotig werm wintjers. Vanwaege de ligking baove de temperatuurinversielaog zeen de hoog berg erg gesjik veur astronomische observaties. Hieveur geuf 't twee grote observatoria, 't Teideobservatorium op Tenerife en 't Roque-de-los-Muchachosobservatorium op La Palma.

De houfsjtad van de autonoom gemeinsjap is zowaal Santa Cruz de Tenerife es Las Palmas de Gran Canaria, die zelf ouch weer de houfsjtad zeen van de provincies Santa Cruz de Tenerife en Las Palmas. Las Palmas de Gran Canaria is al saer 1768 de grootste sjtad van de eilenj (mit oetzunjering van 'ne kórten tied in 1910). Tösse de territoriaal verdeiling van Sjpanje in 1833 en 1927 woor Santa Cruz de Tenerife de einige houfsjtad van de eilenj. In det litste jaor waerde besjlaote det dees sjtatus gedeild zów waere, wie 't noe nog is. De op twee nao grootste sjtad van de Canarische eilenj is La Laguna op Tenerife.