Boris Jeltsin

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Boris Jeltsin

Boris Nikolajevitsj Jeltsin (Russisch: Бори́с Никола́евич Е́льцин) (Boetka, 1 fibberwarie 1931 - Moskou, 23 april 2007) waas van 1991 toet en mit 1999 d'n ieëste prizzendènt van Róslandj.

Van 1961 toet 1990 waas Jeltsin lid vanne Communistische Partie vanne Sovjet-Unie. In 1986 waerde d'r door Michail Gorbatsjov beneump toet partiesjef van Moskou, wo d'r zich ónger anger inzat veur 't taengegaon van corruptie. Jeltsin vónj det de perestrojka, de hervörmige vanne Sovjet-Unie, te traog gónge, wodoor d'r oet zien amb gezat waerde.

In 1989 woort t'r aevel verkaozen es lid van 't Congres van Vouksaafgevaerdigde en kreeg t'r zitting inne Opperste Sovjet. In 1990 verleet t'r de Communistische Partie; hae stal zich pertieloos kandidaot veure prizzendèntsverkeziginge. Op 12 juni 1991 wón d'r mit 57% vanne stumme dees verkeziging.

Ónger aanveuring van Vladimir Krjoetsjkov woort op 18 augustus 1991 'ne staotsgreep gepleeg taenge Gorbatsjov en Jeltsin. Hiebie tróch Gorbatsjov zich trögk, meh Jeltsin zat juus d'n aanval in taenge de staotsgreep. Jeltsin klóm hiebie op 'nen tenk wo d'r 'n toespraok heel; hiedoor koos 't laeger ziene kantj en mislökdje de staotsgreep. Begin dieëtsember 1991 verklaordje Oekraïne zich ónaafhenkelik en 'n waek d'rop deej Gorbatsjov de Sovjet-Unie óntbinje; Jeltsin bleef de prizzendènt van Ruslandj.

De jaore daorop heel Jeltsin väöl kóntak mitten Amerikaanse prizzendènt Bill Clinton, waat good waas veure verstandjhajing tösse de twieë lenjer. Zien prizzendèntsjap kinmirk zich aevel ouch door 'n minder periood, worónger de Roebelcrisis, waat de economie van Róslandj deej samevalle. Zien slechte gezóndjheid en drankperbleem zörgdje dökker veur apaarte toestenj.

Op 31 dieëtsember 1999 lag Jeltsin zien wirkzaamheje neer, worop Vladimir Poetin zien functie euvernoom. Jeltsin stórf op 23 april 2007 op 76-jäörige laeftied door 'nen ónverhödsen hertstilstandj.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Boris_Jeltsin&oldid=443469"