Boek

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De boek of 't abdomen (ouch pens) is bie gewerveldje dere, worónger de miens, 'n holte, de boekholte, die is gevöldj mit 'n aantaal aan organe die veural te make höbbe mitte spiesvertaering, de perduksje van urien enne veurtplantjing. Organe die zich ech inne boekholte bevinje, wie de maag, de laever, de miltj en 't euverdeil vanne derm ligke intraperitoneaal (binnen 't boekvlees); organe die dao-aan waal grenze meh zich neet ech inne boekholte bevinje, wie de nere enne alvleisjkleer, neump me extra- of retroperitoneaal. 'n Orgaan wie de uterus is e bietje e grensgeval.

't Boekvlees of peritoneum is e vlees det de boekholte ane binnekantj enne boekorgane ane boetekantj bedèk.

De boekholte is aafgesjèdj van 't hert enne lónge door 't midderif of diafragma, 'n spier inne vorm van 'n dun koeppelvörmige plaat die bie sametrèkking de bórsholte vergruuetj t'n koste vanne boekholte, zoeadet de lónge zich vól mit lóch kónne zuge. Ómdet de boekinhaad koum samedrökbaar is, zal hiebie de boekwandj get nao boete kómme. Inne midde vanne boek zitj de navel.

Oppe boek van mansluuj (en sómmige vrólje) greutj, aafhenkelik vanne gene, boekhaor. Dit haor óntwikkeldj zich inne puberteit en kan bestaon oet 'ne streep aan haor tösse de sjaamstreek enne navel, mer 't kan ouch de ganse boek bedèkke.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Boek&oldid=386126"