Anne-Marie Bemelmans-Steynebrugh

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Anna Maria Theresia (Annemie) Bemelmans-Steynebrugh, (Valkeberg, Boete de Paort, 24 juli 1926Valkeberg, 26 januari 2011) waor ein Valkebergse diechteres, sjriefster en toneelsjpeelster.

Biografie[bewirk | brón bewèrke]

Erna van Gerwen-Meurders, Anne-Marie Bemelmans-Steynebrugh en Nelly Verkuyl bie AVRO's Wie van de 3.
Anne-Marie Bemelmans-Steynebrugh bie de presentatie van häöre gediechtebundel in 1991

Anne-Marie woort gebore es jóngste kind van 6 es dochter van Winand Steynebrugh en Katharina (Nettchen) Ferenschild. Ze woonde vreuger onderaan de Cauberg wao häöre pap en later häöre broor 'n sjildersbedrief houwe en häör mam en later häör zuuster Ritha Steynebrugh lang eine souvenirswinkel houwe. 'T hoes houw 'Gummie'-moere, woort gezag, want in de twiède waereldoorlog kaome väöl familielede Ferenschild oet 't pas gebombardeerde Aoke ouch in 't hoes wone. De vriejen tied in 't creatieve gezin woort gevöld mèt toneelsjpele, handwèrke, teikene, sjildere, sjrieve, meh veural mèt muziek make. D'r woort op de piano, gitaar en cither gesjpeeld en dao woort veural väöl bie gezónge.

Annemie haet hièl häör leve gediechte gesjreve. Op initiatief van häör dochtersj in 1991 woorte väöl van dees gediechte in 't Valkebergs dialek gebundeld in de gediechtebundel "Vallekeberg ein Paradies", mèt illustraties van häör zuuster Magda Cobbenhagen-Steynebrugh. Op jonge laeftied kreeg zie al de kans öm häör gediechte of tekste veur te drage bie o.a. preesterjubilea of ander fièste. Neve eige werk declameerde zie ouch dèkser werk van bieveurbeeld Anneke Ubaghs-Cobbenhagen en Karel Dorren. Toneelsjpele deeg Annemie o.a. in de schouwburg en 't Valkebergse Openluchttheater toen 'r groate producties plaatsvonge; zoa és Rooske Kleef, de Klokke van Corneville en Zigeunerbaron. Dit deeg zie ouch bie de jaorlijkse "Masjerang" van Veldeke-Valkeberg. Ouch mèt häör vriendin, butekampioen Erna van Gerwen-Meurdersj haet ze dèks gesjpeeld.

In 1974 deeg Annemie neve Nelly Verkuyl en Erna Meurdersj mèt aan ‘t AVRO televisieprogramma Wie van de 3.

Van jongs aaf aan haet Annemie gezonge mèt häör mam, die in 't Aokens theater es sopraan haet gezonge en mèt häör breurs, zuusters en vriendinne. Ze zong daoneve allein en in vereinigingsverband ouch bie 't Maagdekoar, mezieksjoalkoar, Kunstkringk en Walram. Bie 't Klokkekoar en 't St. Caeciliakoar van de Nicolaasparochie zong Annemie väöl jaore same mèt häör dochter Jeannette, die ouch jaorelangk soliste waor.

In 1993 sjreef ze veur Zangvereiniging Orphée eine Valkebergse teks op de Deutsche Messe van Franz Schubert. Tot aan haar sjterve waor zie ièrelid bie dit koar.

Bie ’t Road Kruus lièrde ze in 1948 Frans Bemelmans kènne, zoon Willem Bemelmans en Anna Errens oet Klumme. Hae wèrkte bie de gemeinte Valkeberg. Ze zin getrouwd op 3 mei 1952. Oet dit huwelijk woorte veer dochtersj gebore. Frans sjtorf in 1986, wao nao Annemie zelf krank woort. Op 26 januari 2011 ies ze gesjtorve nao ein lange verzörging in Verpleeghoes Valkenheim. Ze woort vanoet de ouw kèrk begrave op de begraafplaats aan de Cauberg. Op weeg noa de Cauberg sjtopte de rouwauto Boete de Paort bie ’t monument aan ’t Grendelplein, zoa es dat gesjreve sjteit in Annemie’s gediech: “Boete de Paort”.

Publicaties[bewirk | brón bewèrke]

  • in 't weekblaad Land van Valkenburg
  • in 't kwartaalmagazine Geulrand
  • in 't kwartaalblaad van 't CDA-campagneteam
  • in de jubileumkrant van 't St. Caeciliakoar van de ouw kèrk in 't kader van 't 150-jäörig jubileum (1976)
  • in 't jubileummagazine van mannekoar Geulklank (1990)
  • de gediechtebundel Vallekeberg ein paradies (1991).
  • in de bloomlezing Rierank van Veldeke-Valkeberg (1992)
  • de Dialekmès, Valkebergse tekste op de muziek van de Deutsche Messe van Franz Schubert (rechte bie en oetveuring door Zangvereiniging Orphée oet Houtem-St. Gerlach) (1993)
  • in 't jubileummagazine van 't St.Caeciliakoar van de ouw kèrk in 't kader van 't 175-jäörig jubileum (2001)
  • postuum in 't beukske Valkebergs (2013)
  • postuum in 't Rundsje van Zangvereiniging Orphée (vanaaf 2017)
  • postuum in "In Vredesnaam" (2018)

Sjtäölke[bewirk | brón bewèrke]

"jóng woarum toch al dat sjelle
dao kins te de zón ouch neet mèt gelle
ofs te noe flot kruups of get zachter
regene deit 't ouch dao achter"

oet: Twiè pieringe, Vallekeberg ein paradies 1991

Trivia[bewirk | brón bewèrke]

  • Twiè breursj Steynebrugh waore betrokke bie de ièrsjte muzikale activiteite van väöl 'Boete de Poortse'-jonges, wat later Mannekoar Geulklank zouw were. De ièrsjte repetities vonge plaats in de keuke bie ma Steynebrugh.

Zuug ouch[bewirk | brón bewèrke]

Wikibrónne
Wikibrónne haet ouch 'n pazjena mit sjtäölkes en brónne euver Annemie Bemelmans-Steynebrugh.