Akkerbótterbloom

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Akkerbótterbloom of akkerhanevoot (Ranunculus arvensis), neet te verwarre mit weibótterbloom, is 'n bótterbloom oete ranonkelfemielje (Ranunculaceae). De plantj is erg bedreig en hieël zeldjzaam gewaore. Allewiel kump ze in Nederlandj allein nag veur in Zuud-Limbörg. Ze greutj op zónnige, aope plaatsen op vrie druuege toet vöchtige, maotig aetes- en kalkrieke gróndj. Meistes vindj me de akkerbótterbloom op wintjergraanakkers, en hieël aventoe op braakgrunj en ómgewirkdje gróndj.

De akkerbótterbloom is 'n einjäörige plantj en wuuertj 20 de 60 cm hoeag. De blome bleuje van mei toet en mit julie. De stingele zeen leechgruuen en behaordj, al minder ane voot en meistes kaal anen toep. De ungelste blajer zeen neet gedeildj; de euverige blajer höbbe drie deilblaedjes die veur 't grótste deil wiejer in 2 of 3 smaal slepe zeen verdeildj, die allein anen toep zeen ingesni-jje. De blome zeen leech-gruuensig gael en 0,4 toet 1,2 cm groeat. De kelchblajer ligke loos taenge de kroeanblajer aan. De bloomsstele zeen óngegreuf. Eder bloom maak meistes 3 toet 8 vröchte, die 5 toet 8 mm lank zeen. Dees vröchte zeen ruum twieë keer zoea lank es die vanne anger bótterblome.