Ahmed Aboutaleb

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Ahmed Aboutaleb.

Ahmed Aboutaleb (Arabisch أحمد أبوطالب‎ ʾaḫmad ʾabū ṭālib; Beni Sidel, 29 augustus 1961) is 'ne Marokkaans-Nederlandse politicus veur de PvdA. Anno 2015 is heer börgemeister vaan Rotterdam; ieder waor heer wèthawwer en staotssecretair.

Biografie[bewirk | brón bewèrke]

Veur de politiek[bewirk | brón bewèrke]

Aboutaleb woort gebore in 't dörpke Beni Sidel, in de provincie Nador in 't Rifgebergde. Ziene pa waor imam. In oktober 1976 kaom heer mèt zien ma en breurs nao Nederland. Heer lierde vlot Nederlands en deeg achterein de lts, de mts en de hbs telecommunicatie. Heer góng wèrke bij Veronica, de NOS en tot slot RTL Nuits. Tenao woort heer peersveurliechter bij 't ministerie vaan WVC en de SER.

Zoe raakde her bij de politiek betrokke. In 1998 woort heer directeur vaan 't multicultureel instituut Forum. Bij de verkezingseuverwinning vaan de LPF in 2002 dach heer dreuver um veur die partij in 't kabinèt te zitte. Nao get sollicitatiegesprekke kierden 'r ziech evels vaan de LPF aof, umtot häör lier häöm neet aonstoont. In plaots daovaan woort heer e jaor later lid vaan de PvdA. Veur die partij volgen 'r in 2004 Rob Oudkerk op es wèthawwer in Amsterdam.

Wèthawwer[bewirk | brón bewèrke]

In zien porteful zaote de zake oonderwies, jäög, werk en inkoume zoewie groetesteidebeleid. Aboutableb kraog dao neve börgemeister Job Cohen groete bekindheid es 't allochtoon geziech vaan de partij, boe nao de maord op Theo van Gogh groete spanninge waore oontstande. Zien röstege meh dudeleke meneer vaan doen deeg väöl um alles te kalmere. Bij de raodsverkezinge vaan 2006 haolde heer e groet aontal veurkäörstumme binne.

Es wèthawwer veurde heer oonder mie 't 'poscodebeleid' veur basissjaole in: um segregatie tege te goon mochte sjaole allein nog kinder oet hun eige wiek aonnumme. Wijer pleitde heer veur 't intrèkke vaan oetkieringe veur vrouwlui mèt 'ne boerka, umtot die ziech door ziech zoe te kleie wèllens en weitens zouwe oetslete vaan d'n arbeidsmerret. Ouch stèlde heer hoesbezeuk in veur lui mèt oetkieringe. Dit reep váöl weerstand op en bij rechszake woort de gemeinte Amsterdam in 't oongeliek gestèld.

Staotssecretair[bewirk | brón bewèrke]

In aonluip nao de Twiede Kamerverkezinge vaan 2006 tipde Wouter Bos Aboutaleb es minister vaan Oonderwies. In 't kabinèt-Balkenende IV, wat e paar maond later woort geïnstalleerd, woort heer oetindelek staotssecretair vaan Sociaal Zake en Werkgelegeheid. Zien dobbel nationaliteit brach häöm en zien Turkse collega Nebahat Albayrak 'n motie vaan wantrouwe door de extreemrechse PVV. In ziene relatief korten tied es staotssecretair heel heer ziech ouch mèt vraogstökker roontelum integratie bezeg, boe heer ziech op bleef profilere.

Börgemeister[bewirk | brón bewèrke]

In oktober 2008 woort bekind tot Aboutaleb had gesoilliciteerd nao de börgemeisterspos in Rotterdam. Dao zoch me 'nen opvolger veur Ivo Opstelten. Op 16 oktober woort heer door de raod veurgedrage. ouch noe had de rechse oppositie, in de persoen vaan Ronald Sørensen, principeel bezwoere tege 'ne Marokkaan es börgemeister, allewel tot aandere binne zien partij (wie Marco Pastors) häöm zjus hadde gesteund. Ouch Fleur Agema vaan de PVV verlangde e debat, wat woort geweigerd. 't Kabinèt naom de veurdrach euver en op 5 jannewarie 2009 woort Aboutaleb geïnstalleerd.

't Blaad Elsevier koos Aboutaleb in 2014 tot 'mins vaan 't jaor'.

Persoenelek[bewirk | brón bewèrke]

Aboutaleb is getrojd en heet drei kinder. Heer is praktiserende moslim.

Bron[bewirk | brón bewèrke]

Dit artikel is vertaold oet 't corresponderend Nederlandstaoleg artikel, en wel in dees versie.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Ahmed_Aboutaleb&oldid=408153"