Aalsmeer

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Aalsmeer in Noord-Holland

Aalsmeer (plaotselek Hollands: Buurt) is 'n plaots en gemeinte in de Nederlandse provincie Noord-Holland, tege de grens mèt Zuid-Holland, aon de rand vaan de Haarlemmermeer, mèt op 1 juli 2006 14.539 inwoeners. 't Oppervlak bedräög 34,40 km², boevaan 11,71 km² oet water besteit. Aalsmeer is bekind es centrum vaan tuinbouw en heet de groetste blómmehandel vaan de wereld binne zien grenze.

Historie

Wie Almere heet ouch Aalsmeer, in 1133 veur 't iers geneump es Alsmar, ziene naom waorsjijnlik te daanke aon e meer, boe me in de Middeliewe op iel (Hollands aal of paling) visde. De ielvangs is iewelaank e bestoonsmiddel gewees en weurt tot op d'n daag vaan vaandaog op amateurbasis veurtgezat.

Wie Alsmar in 1133 geneump woort waor 't neet mie es e naat törfgebeed. In dit jaor weurt 't euvergedraoge aon de abdij vaan Rijnsburg. Dees donatie weurt in 1199 bevesteg. In de koumende iewe weurt in hoeg tempo de törf aofgegraove; heidoor kump Aalsmeer ummer mier in watergebeed te ligke en geit de landbouwgroond verlore. De meiste bewoeners sjakele euver op de vèsserij. In de nuien tied weure de versjèllende plasse weer ingepolderd. Es midde negentiende iew oetindelek ouch de Haarlemmermeer weurt druuggelag sjakelt de plaotseleke bevolking weer euver op de landbouw, in 't bezoonder op tuinbouw. Aalsmeer woort 'n belangrieke producint vaan eerbeize en zouw dat tot deep in de twintegste iew blieve. Later kaome ouch ander tuinbouwproducte op, boevaan de seerblómme de succesvolste waore. Tot de ier vaan dees bedriefstak woort in 1962 e standbeeld vaan de godin-personificatie Flora opgeriech.

Taol

De bewoeners spraoke vaanajds e Hollands dialek wat sterk versjèlde vaan alles wat in de umgeving woort gesproke, zeker ouch vaan aander aajd-Hollandse dialekte in de buurt. 't Klassiek Aalsmeers is in 2004 oetgestorve; 't vèlt evels neet oet te slete tot sommege lui nog aajd Aalsmeers taolgood gebruke.

Externe link

• Website vaan de gemeinte