Zuul (gereidsjap)
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
'n Aels of 'n zuul (sjleiptoan) ies 'n soort gereidsjap dat liekent op 'n priem, en dat veural gebruuk weurt door de sjoester of zadelmeker. Um laer te kènne nièje moete van te veure leukskes gemaak were in de te verbinge sjtökker laer. Dat gebeurt mèt de aels. 't Metale gedeilte, dat door 't laer gesjtoke weurt haet 'ne speciale roetvörmige of pestielvörmige doorsjnee. Mèt dieker (vösjersj)gare, dat van te veure ingesjmeerd ies mèt biejewas um 't good te laote glietsje, of mèt dun laerband kèn daonao begoes were mèt nièje.
'n Ander wèrktuug um klein leukskes te make ies de drietand. Dit metale apparaat, dat liekent op 'n klein rechte versjèt mèt 3 tennekes, sjtans drie leukskes op riej. Daomèt were, mèt de hand, regelmaotige näöd genièjd.
Um groater loker te make, um bieveurbeeld 'ne reem, dae door 'n gesp geit, te kènne vaszètte, weurt 'n revolvertang gebruuk.