Laer
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
Laer is matterjaal det wuèrtj gemake vanne hoed van (veur vleisjconsumptie-gebroekdje) dere, wie kuuj of kuusj. Luxer laersaorte zeen aafkumstig van dere wie 't hir, e lam of e kaaf. Ouch de hoed van krókkedille en slange wuèrtj of woort waal toet laer verwirk, aevenes sómmige kraakbeinvèsje (hejje en rogge).
Veurdet laer kan waere gebroeke mót 't geloajdj waere. Daomit wuèrtj de hoed vriewaal ónbepirk haadbaar. Laer wuèrtj meistes ouch in 'n kluèr gevarf.
Laer wuèrtj gebroek veur tesje, sjoon, jasse, muibele en zo wiejer. Moatorriejers drage döks laere pakker veur taenge eventueel valle te besjurme, mer 't drage van laer haet ouch veur sómmige 'n seksueel beteikenis, fetisjisme.
Ómdet laer kosbaart is, wuèrtj ouch kónslaer gebroeke veur al dees toepassinge. Döks krieg kónslaer 'ne kónsmaesige laergäör veur 't op laer te laote lieke. Laer haet óngerhaad nuèdig. Veural sjoon mótte veur 't laer soeppel te haje regelmaesig gepoetsj waere mit sjoonsmeer.
Laer det inne baom terechkump blief good bewaardj. Laere veurwirper zeen bekandj oet tieje wie de middeliève, mer ouch d'n iesmummie Ötzi oet 3300 v.Chr. haw laere veurwirper bie zich, wovan de deersaort zelfs nag kós waere bepaoldj.