Zuid-Koreaons hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Zuid-Koreaons hierevoetbalèlftal (bijnaom 태극전사 'de Taeguk-kriegers' of 아시아의 호랑이 'de tiegers vaan Azië') vertreujt Zuid-Korea op internationaol voetbalmatche. 't Team is al tientalle jaore laank eint vaan de sterkere vaan 't wijer zwaak voetbalcontinent Azië. Eine kier, in 2002, straolden 't team ouch mondiaol.
Historie
[bewirk | brón bewèrke]Britse marineers brachte ind negentienden iew veur 't iers voetbal nao Korea. In 1905 woort Korea 'n Japanse kelonie en in 1910 woort 't zelfs integraol deil vaan Japan. Vaan 'n officieel team kós daorum gein spraoke zien. Wel bleujde 't voetbal tösse 1910 en 1940 op. Mèt de stiechting vaan de Joseon-liga woort binne 't Koreaons deil vaan 't riek 'n eige liga gestiech. Bèste team vaan Korea waor in deen tied Joseon FC, wat es 'n soort officieus nationaol èlftal woort gezeen en dèks gooj rizzeltaote haolde tege clubs oet 't eigelek Japan. Speulers wie Kim Yong-sik kaome ouch veur 't Japans nationaol èlftal oet.
Nao d'n Oorlog woort Korea oonaofhenkelek, meh 't woort astrein verdeild in e noordelek en zuielek deil. In 1948 woort e Zuid-Koreaons team erkind, wat op de Olympische Speule in Londe voetbalde. Al in d'n ierste match, 'n 5-3 euverwinning op Mexico, woort dujelek wie wied 't land al waor mèt voetbal. In 1954, op 't Wereldkampioensjap in Zwitserland, deeg 't land ouch mèt, evels zoonder succes: 't land verloor mèt 9-0 vaan Hongarije en mèt 7-0 vaan Turkije.
In 1956 woort veur 't iers de Asia Cup gehawwe, die Zuid-Korea won. Veer jaor later, in eige land, woort ouch de wins gepak. Probleme mèt de wereldpolitiek zörgde nog welins deveur tot Zuid-Korea neet aon internationaol toernoje mètdeeg. In 1958 woort 't vaan WK-kwalificatie oetgeslote, in 1966 sjreef 't land ziech neet in oet angs veur tege Noord-Korea te mote speule. Binnen Azië waor d'n tegestand nog ummer zwaak; dèks kós Zuid-Korea direk instruime in de Asia Cup door e gebrek aon deilnummers. Wel waor in dezen tied Iran hendeg es groetmach in opkoms; nog dèks zouwe Zuid-Korea en Iran speule um de ier vaan bèste team in Azië. In 1964 stoont 't team nog wel op de Speule in Tokio.
In 1986 plaotsde 't land ziech veur 't iers in langen tied weer veur e WK. Mèt ei geliekspeul en twie verleesbeurte kaom 't team neet wijer es de grópsfaas. In 1988, bij de Olympische Speule in eige land, en ouch de lèste kier tot A-teams op de Speule acteerde, wis Zuid-Korea twie kier geliek te speule en verloor 't eine kier. Ouch op de WK's vaan 1990, 1994 en 1998 (wie 't land mèt Nederland (5-0 verlees) en 't Belj (1-1 geliek) in de poule zaot) haolden 't land vergliekbaar rizzeltaote.
't 5-0 verlees tege Oranje, in Zuid-Korea bekind es de 'tragedie vaan Marseille', waor rei veur hervörminge. Oetgerekend Guus Hiddink, dee Nederland in dee match had gecoach, woort aongetrokke. Directe rei waor 't WK vaan 2002, wat in Japan en Zuid-Korea gehawwe woort. Me voont 't belaankriek noe good veur d'n daag te koume - es 't eve kós beter es groete rivaol Japan. Wie Zuid-Korea, wat nog noets 'ne match op 't WK had gewonne, oonder Hiddink alle drei de grópsmatche won, braok de gekkegheid oet in 't land. In de achste finales mós 't land op tege Italië, wat veuraof zoe good wie oonmeugelek leek meh boe 't team nao verlenging mèt 2-1 vaan won. Ouch de kwartfinaal tege Spaanje woort benajd gewonne. Oetindelek waor Duitsland in de haaf finaal te sterk. Hiddink woort door dees prestaties 'ne volksheld in Zuid-Korea, boe me e standbeeld veur 'm opriechde en boe heer es ierste boetelender ierebörgersjap kraog. Zie geboortedörp Varsseveld in d'n Achterhook greujde oet tot pelgrimsoord veur Koreaonse voetbalfans.
't Oetzunderlek niveau vaan 2002 kós 't team neet vashawwe, meh 't team bleef wel eint vaan de bèste vaan Azië. Op dat continent waor 't niveau intösse veuroetgegaange, zeker nao de touwtrejjing vaan Australië tot de AFC. Zuid-Korea heet ziech in d'n twintegsten iew veur eder WK geplaots. De bèste prestatie sinds 2002 waor op 't WK vaan 2010 in Zuid-Afrika, wie 't land de achste finales haolde. Staarspeuler waor in deen tied aonveurder Park Ji-sung.