Belsj hierevoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Belsj in 'n wèdstrijd tege Algerije op 't WK vaan 2014. Op de veurgroond Toby Alderweireld.

't Belsj hierevoetbalèlftal woort in 1904 opgeriech en kump in internationaol voetbalwèdstrije veur 't Belsj oet. Um hun roed shirt stoon ze bekind es de Roej Duvels. 't Team weurt behierd door de KBVB, ein vaan de stiechtende leie vaan de FIFA. 't Belsj èlftal heet door de jaore heer wisselend succes gehad. D'n insegsten titel waor de Olympische medajel in 1920. Es heimstadion gelt 't Keuning Boudewijnstadion in Brussel. Op dit memint (sinds midde mei 2018) stoon de Belzje daarde op de FIFA-wereldraanklies; in jannewarie 2016 stoonte ze zelfs bovenaon. Trainer vaan 't Belsj hierenèlftal is Roberto Martínez. De mies opgestèlde speuler is Jan Vertonghen mèt 101 interlands; topscoorder is Romelu Lukaku mèt 34 gole. De belaankriekste sportief rivaliteit is mèt Nederland.

Historie[bewirk | brón bewèrke]

't Belsj voetbalèlftal debuteert in 1904, 't jaor tot de FIFA weurt opgeriech, mèt 'ne match tege Fraankriek. 't Lök de Belzje direk veur mèt 3-3 geliek te speule. Al vaanaof hiel vreug speule ze in 't roed, wat in 1906 Pierre Walckiers de bijnaom Roej Duvels deit bedinke. In 1905 trejt 't èlftal in Antwerpe veur 't iers tege Nederland aon; Belsj verluis mèt 1-4. De Derby vaan de Lieg Len weurt t/m 1968 'n bekans jaorlekse traditie; ouch daonao speule de twie teams nog dèks vrundsjappelek tegenein. Kort nao d'n Ierste Wereldoorlog kump 't team tot bleuj. Op de Olympische Speule in 1920, toes in Antwerpe, weure ze kampioen. Ouch aon de wereldkampioensjappe vaan 1930, 1934 en 1938 doen ze mèt, meh ze zien neet opgewasse tege de echt groete voetballen en koume alle drei kiere neet wijer es de ierste runde.

Ouch nao d'n Twiede Wereldoorlog waore de prestaties aonvenkelek nog neet bezunder groet. In 1954 kaome ze weer neet door de veurrundes, daonao späölden 't team tot 1970 gei WK mie. Dat jaor in Mexico wiste ze wel veur 't iers 'ne wèdstrijd op e WK te winne. In 1972 deeg Belsj ouch veur 't iers aon 'n Europees kampioensjap mèt; hei woorte ze daarde. Nog e stök succesvoller waore de jaore tachteg. Nao 'n twiede plaots op 't EK vaan 1980 kaome de WK's vaan 1982 en 1986. Op dat lèste toernooj haolde ze zelfs de veerde plaots, al gebäörde dat mèt väöl gelök en dèks op 't rendsje.

Dit succes bleef neet dore. Op de WK's die volgde waor hun speul dèks flets en hun prestaties gemiddeld. Veur 't EK wiste ze ziech nao 1988 neet mie te plaotse, mèt oetzundering vaan 2000, wie 't Belsj same mèt Nederland 't kampioensjap organiseerde en dus otomatisch geplaots waor. Kwalificaties veur WK's en EK's gónge dèks kansloes verlore.

Pas roond 2010 kaom dao verandering in. 'n Gestiedege professionalisering oonder coaches Dick Advocaat en George Leekens veel same mèt de opkoms vaan 'n nui generatie getalenteerde voetballers, die bij prestigieus, väölal Britse clubs gónge speule (Romelu Lukaku, Eden Hazard, Axel Witsel, Kevin De Bruyne etc.). Nao de koms vaan Marc Wilmots góng 't hel veuroet. De kwalificatie veur 't EK vaan 2012 góng zjus verlore, meh op 't WK vaan 2014 waore de Belzje weer presint. Nao 'n geslaogde kwalificatie veur 't EK vaan 2016 haolde ze väöl lof vaan de sportpers en zelfs evekes de toppositie op de FIFA-Wereldraanklies (jannewarie 2016). De verlore kwartfinaal (3-1 tege Wales) kaom oetindelek nog es 'n groete teleurstèlling. Op 't WK vaan 2018 in Rusland góng 't nog väöl beter: 't Belsj team woort mèt euvermach grópswinner, versloog zelfs Brazilië in de kwartfinaal en woort nao 'n ing verlees tege Fraankriek oetindelek daarde. 't Team woort internationaol gepreze um zie good opgebouwd en sjoen speul. Op 't EK vaan 2021 kaom 't Belsj neet wijer es de kwartfinaal, boe 't vaan de latere kampioen Italië verloor.

Gans teleurstèllend verleep 't WK vaan 2022 in Qatar, boe-in 't Belsj, ingedeild bij Kroatië, Marokko en Canada, zelfs neet veurbij de grópsfaas kaom. Algemein woort gezag tot me te laank op de groete vedèttes had vertojd en tot die noe te aajd waore um nog zoe good te prestere wie veurheer. Ouch gaof 't dujelek spanninge oonderein in de gróp. Kort nao de oetsjakeling besloot coach Roberto Martinez aof te trejje.