Zieëmeermin

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


A Mermaid van John William Waterhouse oet 1900.

'n Zieëmeermin is e mythologisch bieës det in 't water laef. 't Bieës haet 't baovelief van e vrouwmis, meh de bein zeen vervange dore stertvin van 'ne vès. De mannelike variantj, de zieëmeerman, is minder bekandj.

Zieëmeerminne kómme veur in verhaole van versjillendje völker euvere ganse werreld, veural in 't Kortie Oeaste, Europa en Azië. De aadste euverleveringe vanne zieëmeermin kómmen oet Assyrië, wo de godin Atargatis zichzelf oet sjaemdje verangerdj in 'n zieëmeermin, ómdet 't per óngelök ziene minner haet vermaordj.

Sómtieds waere zieëmeerminnen oetgebeeldj es gevieërlike bieëster die zörge veur euverstruiminge, storm, sjeepswrakken en verdrinkinge. In anger verhaole, döks oete zelvendje verhaolkultuur, zeen 't juus benevolente bieëster die zelfs verleef waeren op gewuuen luuj.

Inne Griekse mythologie goof 't de sirenes, haafvrouwmis en haafvogel, die verbleven in grótten en op rótse langs de Tyrreense Zieë. Zie zónge zaach en sjoean en lókdje daomit de sjepers de klimpen op. Zie waere veuren ieëste verneump inne Odyssee van Homerus.

Hans Christian Andersen sjreef 't bekandj verhäölken euvere klein zieëmeermin; in Koupenhage steit e bekandj beeldj van dees zieëmeermin.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Zieëmeermin&oldid=436043"