Waver
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Waver (Frans: Wavre, Waals: Wåve, Auve) ies de hoofsjtad van Belzje provincie Waals-Brabant. De gemeinte Waver haet 'n oppervlak van 41,80 km² en 32.072 inweunersj (1 juli 2005). Behalve de sjtad Waver haet de gemeinte nog de kerne Limal en Bierges. De sjtad liek in 't arrondissement Nijvel en aan de Dijle.
Sjtadsfuncties
[bewirk | brón bewèrke]Waver ies es provinciehoofsjtad 'n administratief centrum. 't Ies 'n verzörgingscentrum veur de umgeving. Ouch haet de sjtad 'n woonfunctie veur forenze nao Brussel. In Waver liek 'n belangriek zendsjtation mèt antennes en zendmaste veur mieddegolf- en FM-radio en veur televisie van de RTBF en de VRT. 't Pretpark Walibi Belgium trèk väöl toeriste.
Sjtadsbeeld en bezeenswaerdighede
[bewirk | brón bewèrke]De sjtad haet neet hendig väöl ouw geboewe, meh toch liegke d'r 'n aantal intersante bezeenswaerdighede. De kèrk Saint-Jean Baptiste ies geboewd in gotische sjtiel en haet 'ne 17e-ièwse tore mèt 'n carillon van 49 klokke. 't Sjtadhoes ies gevestig in 'n veurmalige kloasterkèrk in baroksjtiel. Aan 't sjtadhoes sjteit 't beeldsje van de Maca, e jungske dat de balustrade van 't geboew op klump; nao diet beeldsje weurt de sjtad cité du Maca geneump.
In de wiek Neerwaver (Basse-Wavre) liek de barokke baevaartskèrk van Slevevrouw van Neerwaver, mèt 'n relieksjrien dat saer de 16e ièw jaorliks in de processie Grand Tour door de umgeving geveurd weurt.
Historie
[bewirk | brón bewèrke]In Waver haet me 'ne groate Romeinse villa oet de ièrsjte ièw gevónge.
Pas in de èlfde ièw vink me obbenuujts get euver Waver in de historie. In daen tied óntsjting de plaats es e handelscentrum op de waeg Brussel-Name en Leuve-Nijvel. Doe woort ouch 't gehuch Nederwaver (tegewoordig 'n wiek van de sjtad) belangriek es Mariabaevaartsoord.
Op 18 en 19 juni 1815 vóng hie de sjlaag bie Waver plaats; deze sjlaag tösje de Franse en de Pruusje begoes op dezelfden daag es de sjlaag bie Waterloo.
De gemeinte Waver óntsjtóng bie de gemeintelike herindeilinge van 1977, wie Waver woort samegevoog mèt de veurmalige gemeintes Bierges en Limal. In 1995, wie de ouw provincie Brabant gesjpliets woort in e Vlaams en e Waals deil, woort Waver provinciehoofsjtad.