Paolingkroed

Van Wikipedia
(Doorverweze van Waterhanevoot)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Paolingkroed.

Paolingkroed, waterhanevoot of waterbótterbloom (Ranunculus aquatilis) is 'n euverblievendje waterplantj, behuuerendj toete bótterblomen oete ranonkelfemielje (Ranunculaceae). De bleujperiood löp van april toet augustus. De kelchblajer kónnen aafvalle. De plantj kump veur in klaor, zeut of zwaak braakwater, döks 'n veurkäör veur lich-verzoerdj water, meistes vrie aetesriek, stilstäöndj of lankzem struimendj mit maximaal eine maeter aan deepgank. Bestuving vindj plaats door insekte. Ouch kan zelfbevröchting plaatsvinje bie óngergedaoke blome. Kwekkerte lègke gaer eier bie of oppe blajer van 't paolingkroed.

De blajer van 't kroed vallen oeterein in drie saorte: die waat baoven 't water oetstaeke zeen stevig en róndj toet neervörmig; die ónger 't water lankwirpig en dón, twieë of driespletig in in dón slepe gaffelvörmig vertak. Daonaeve guuef 't döks euvergangsblajer die deils in draodvörmige slepe zeen gedeildj en deils blaadechtig en in vrie spitse tenj oetloupendj zeen. De blajer ónger 't water kónnen ouch gans óntbraeke. De drievendje blajer zeen döks in drie toet zeve deiler ingesni-jje. Ane puntj kónne ze getandj zeen. Dees blajer kómmen ouch veur wen de plantj op 't sliek greutj. De stengel ónger 't water kan toet 2 m lank zeen.

De blome zeen 7 toet 20 mm groeat en höbbe vief witte kroeanblajer mit renj die einanger bedèkke rónjelóm e gael hert. De kroeanblajer höbben ane voot 'ne gaele nagel. 't Guuef 5 toet 20 maeldräöj. De honinggreuf is meistes róndj. De vröchsteel is bao noeatj langer es 5 cm. De vröch is 'n ovaal doepvröch.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Paolingkroed&oldid=416092"