Valkebergse zedezaak

Van Wikipedia
Naar navigatie springen Naar zoeken springen
Dit artikel is in versjillende Limburgse dialekte gesjreve. Ómdat 't plaotsgebónje is maogs doe 't ómzètte nao 't Valkebergs, as te dit dialek sjpriks.

De Valkebergse zedezaak is e gerechtelek dossier mèt zienen oarsjpróng in Valkeberg. In oktober 2014 woort óntdèk dat e zèstienjaoreg maedsje in e Valkebergs hotel geprostitueerd woort. 'ne 21-jäörige 'loverboy', Armin A., koes direk gearresteerd were. Later ónderzeuk riechde ziech op de klante, die en masse woorte gevónge. Ouch al door zienen umvank haolde de zake tege de souteneur en de klante landelek 't nuujs.

Begin[bewirk | brón bewèrke]

In september 2014 raakde e meidske, in de media oonder de sjuilnaom Kimberly bekind, vermis. Häör awwers meinde al direk tot hun dochter woort geprostitueerd en tot Armin A. drachter zaot. Naotot de pelitie ze neet kós vinde, sjakelde de pa op 10 oktober 'ne privédetective in.[1] Later dee maond veel de pelitie Hotel Botterweck in Valkeberg binne. In 'n aonpaolend appartemint, wat me veur langeren tied kós aofhure,[2] troffe ze e meidske vaan 16 wat seks had mèt 'ne volwasse maan. De souteneur zaot zjus op de plee en kós astrein weure gearresteerd. Via dee zienen tillefoon voont me diverse klante. Volgens de politie waore in tien daog zoe'n viefteg maanslui es klant op de kamer gewees; e getal wat later umhoeg woort bijgestèld tot tachteg.[3] Oonder hun waore ouch Belzje en Pruse.[4] Tege sommege vaan de verdachte woort forensisch oonderzeuk ingestèld: in de hotèlkamer stoont 'nen drekbak vol gebruukde condome, boe-oet DNA-spore kóste weure gehaold. 't Oonderzeuk kaom in jannewarie 2015, drei maond nao d'n inval, nao boete.[5]

Volgens de media kaome zoewel 't meidske[6] es de loverboy[7] oet Heerle.

Gerechteleke situatie[bewirk | brón bewèrke]

In Nederland liek de grens van seksueel mièrderjaoregheid bie zèstien jaor. Seksueel contak mèt insjtumming ies dus bove deze laeftied neet verboje. Prostitutie maog èvvel neet es de prostitué ónder de achtièn ies. Me kint dao es klant 'n sjtraof van veer jaor veur kriege, of 'n boete in de veerde categorie (Art. 248b WvS).[8] Souteneur Armin A. woort door versjeie media umsjreve es loverboy, wat zouw beteikene dat hae 't maedsje haet misleid en daonao in de prostitutie haet gedwónge. Dit vèlt ónder miensjehandel; de sjtraof hieveur kin tot tièn jaor oploupe.[9]

Zaak tege Armin A.[bewirk | brón bewèrke]

Volgens d'n avvekaot kaom 't initiatief veur de betaolde seks vaan 't meidske zelf; ze zouw dat in eder geval in ierste instantie höbbe verklaord.[10] De pa spraok dat tege: "Mien dochter is neet ein of aander fluit."[11] Ouch vaan 'n aander meidske kaom de besjöldeging tot A. häör geprostitueerd hej; ze hej evels oet angs nog gein aongifte gedoon.[12] Daobij had de maan e krimmeneel verleie; heer had vief jaor ieder al in jäöggevaangenis 't Keerpunt in Keer gezete.[13]

Oetindelek kaom 't OM wel tot de conclusie tot A. 't meidske neet gedwoonge had; de aonklach woort daorum beperk tot 't aonzètte tot prostitutie vaan 'n minderjaorege.[14] De eis woort op 18 juni 2015 vasgestèld op drei jaor gevaangenis, boevaan zès maond veurweerdelek; daobovenop zouw 'ne preuftied vaan drei jaore weure opgelag.[15] Twie weke later, op 2 juli, woort häöm oetindelek twie jaor oonveurweerdelek en 'n sjaojvergeujing vaan 2500 euro opgelag. De straof waor oonveurweerdelek, umtot 'nen iedere preuftied nog leep.[16] In de zaak woort gein hoeger beroop aongeteikend.[17]

In fibberwarie 2016 kaom A., naotot heer twiedaarde vaan zien straof had oetgezete, veurweerdelek vrij. In juni woort heer weer opgepak umtot heer zienen inkelband had gesaboteerd en zie gebeedsverbood had gesjonne. Heer kraog daoveur 30 daog gevaangenis, die heer in veurarres al had oetgezete.[7]

Zaak tege klante[bewirk | brón bewèrke]

Umtot in 't verleie waor gebleke tot 't aonpakke vaan loverboys allein hun klante neet stop, besloot 't Opebaar Ministerie in Mestreech doelbewös veur de horeluipers aon de sjanpaol te zètte.[18] D'n officeer vaan zjustitie zag dao lètterlek euver: "Dat kin gevolge höbbe veur hun houwelek of relatie, dat maak m'ch neet oet. Ze höbbe veur geld seks gehad mèt 'n minderjaorege, dat is straofbaar. Iech gaon ze neet helpe veur dat geheim te hawwe."[5] Wie later 't hoeger beroop deende, betreurde d'n hoofofficeer die wäörd, umtot ze de zaak oonnujeg groet hejje gemaak. Zoe hadde twie verdachte oonder deen drök zelfmaord gepleeg.[19]

Vaan de oongeveer tachteg verdachte woorte 'rs 61 gehuurd. 't OM besloot oetindelek 29 maander te vervolge.[20] Op 9 juli 2015, ein week nao de oetspraok tege Armin A., begós 't perces tege de klante. De ierste zès kraoge straofe vaan zès maond tot ei jaor tege ziech geëis;[21][22] hunnen avvekaot eisde vrijspraok.[23] De aander klante woorte in de daog daonao veurgeleid. Eine vaan hun waor hölpverliener bij Jäögzörg gewees, perceis in 'n instèlling veur loverboys,[24] en hej Armin A. mèt Kimberley in contak gebrach.[19]

Op 23 juli woorte de ierste twelf verdachte veroerdeild. De mieste kraoge rillatief mel straofe: taakstraofe mèt minimaol gevaangenisstraofe debij. De rechter rekende d'n hölpverliener zien misstappe zwoerder aon: dee mós zès maond de cel in, boevaan drei veurweerdelek.[25] Wijer oetspraoke volgde de weke daonao. Heibij woorte twie verdachte vrijgesproke; de mieste aandere kraoge weer taakstraofe.[26] De lèste twie kaome pas ind 2015 veur de rechter.[27]

Bekaans direk nao de ierste oetspraok besloot 't OM in hoeger beroop te goon, en wel in 27 vaan de 29 zake.[28][29] 't Hoeger beroop in Den Bosch begós ind 2016. De officeer eisde weer celstraofe.[30][6] Oetindelek handhaafde de Gerechshoof de mieste straofe: veer keer vrijspraok, 23 kier taakstraof. Es verliechtende umstandegheid veurde me aon tot de klante neet expres nao e minderjaoreg meidske op zeuk waore gegaange.[31]

Hei-op góng 't OM begin 2017 in cassatie.[32] Zès specifieke zake waorte aon d'n Hoege Raod veurgelag. De Raod deeg op 20 fibberwarie 2018 oetspraok en beheel de taakstraofe.[33]

Rifferenties[bewirk | brón bewèrke]

  1. 1Limburg - Loverboy Valkenburg: privé-detective vond 16-jarig meisje
  2. 1Limburg - Beveiliging na bedreiging hotel Botterweck Valkenburg
  3. 1Limburg - Niet 50, maar 80 mannen hadden seks met 16-jarig meisje
  4. 1Limburg - Ook Duitsers en Belgen hadden seks met 16-jarige
  5. 5,0 5,1 1Limburg - Gebruikte condooms verraden mannen na seks met 16-jarige
  6. 6,0 6,1 Nu.nl - Opnieuw celstraffen geëist in Valkenburgse zedenzaak
  7. 7,0 7,1 Nu.nl - Armin A. krijgt maand cel voor schenden gebiedsverbod
  8. http://www.wetboek-online.nl/wet/Wetboek%20van%20Strafrecht/248b.html
  9. https://www.politie.nl/themas/loverboys.html
  10. 1Limburg - Advocaat loverboy: meisje had hotelseks uit vrije wil
  11. 1Limburg - Vader van 16-jarig meisje: 'Mijn dochter is geen sloerie'
  12. 1Limburg - Loverboy Armin A. sloeg al eerder toe
  13. 1Limburg - Verdachte sekszaak Valkenburg zat vast in Cadier en Keer
  14. 1Limburg - Zaak Valkenburg: meisje niet gedwongen tot seks
  15. 1Limburg - OM eist drie jaar cel tegen loverboy Armin A.
  16. 1Limburg - Twee jaar cel voor loverboy Armin A.
  17. 1Limburg - Loverboy Armin A. definitief twee jaar vast
  18. 1Limburg - OM nagelt mannen in loverboyzaak bewust aan schandpaal
  19. 19,0 19,1 Nu.nl - Hoe zit het alweer met de Valkenburgse zedenzaak?
  20. 1Limburg - OM gaat 29 verdachten vervolgen in Valkenburgse zedenzaak
  21. 1Limburg - Straffen tot één jaar geëist in Valkenburgse zedenzaak
  22. Nu.nl - OM eist celstraffen in Valkenburgse zedenzaak
  23. 1Limburg - Advocaat zes verdachten zedenzaak Valkenburg wil vrijspraak
  24. 1Limburg - Celstraf en beroepsverbod geëist in zedenzaak
  25. 1Limburg - Cel en taakstraffen voor klanten Valkenburgse zedenzaak
  26. 1Limburg - Weer vrijspraak in Valkenburgse zedenzaak
  27. 1Limburg - Twee klanten voor rechter in Valkenburgse zedenzaak
  28. Openbaar Ministerie - Valkenburgse zedenzaak
  29. 1Limburg - Valkenburgse zedenzaak: OM gaat in hoger beroep
  30. 1Limburg - Twee klanten voor rechter in Valkenburgse zedenzaak
  31. Rechtspraak.nl - In hoger beroep Valkenburgse zedenzaak wederom taakstraffen en 4 maal vrijspraak
  32. Nu.nl - Openbaar Ministerie in cassatie in Valkenburgse zedenzaak
  33. Dagblad De Limburger - Taakstraffen Valkenburgse zedenzaak gehandhaafd
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Valkebergse_zedezaak&oldid=443483"