Daarde Devisie

Van Wikipedia
(Doorverweze van Topklasse)
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


De Daarde Devisie is e niveau vaan 't Nederlands voetbal. Um perceis te zien is 't 't veerde niveau vaan de Nederlandse voetbalpiramide, oonder de Twiede Devisie en bove de Hoofklas. Ze besteit oet twie competities, 'n Daarde Devisie Zaoterdag en 'n Daarde Devisie Zondag. Bei competities bestoon oet 18 teams, boevaan drei belofteteams vaan profclubs. De aander teams zien amateurclubs mèt 'n vrij groete maot vaan professionalisatie (späölgeld en winspremies, bedriefsveuring, groete aontalle supporters etc.).

Historie[bewirk | brón bewèrke]

De Daarde Devisie is in principe nui veur 't sezoen 2016/17, meh kump voort oet de Topklas. Die waor pas in 2010 opgeriech, mèt es doel 'n brögk te sloon tösse 't betaold voetbal en 't amateurvoetbal. Clubs móste noe door sportief prestaties kinne promovere nao de profcompetitie, wat iers neet meugelek waor. Umtot 't mer twie Topklasse gaof, tegeneuver zès Hoofklasse, mós dat de concurrentie verbetere (allein de bèste clubs tegenein).

In de praktijk bleek evels 't look nao de Ierste Devisie nog te groet, veural wat betröf de eise die aon de bedriefsveuring en de accomodatie (beveurbeeld stadions vaan minstens 3.000 plaotse) woorte gestèld). Daorum besloot me veur nog e niveau in te stèlle. Dit woort de Twiede Devisie. Dao-in zouwe de zeve bèste teams oet de twie Topklasse vaan 't sezoen 2015/16 instruime, plus veer belofte-èlftalle. Oet 't restant vaan de Topklasse zouw de Daarde Devisie weure gemaak, aongevöld mèt drei belofteteams per competitie en de bèste Hoofklasseteams. Door de oetdunninge vaan 2010 en 2016 gief 't vaanaof 't sezoen 2016/17 nog mer veer Hoofklasse in plaots vaan de traditioneel zès.

'n Daarde Devisie heet 't in Nederland noets ieder gegeve, in tegestèlling tot de Twiede Devisie, die tösse 1956 en 1971 ouch al bestoont.

Kampioene[bewirk | brón bewèrke]

De volgende clubs zien kampioen gewore vaan de Topklas daan wel Daarde Devisie. In de Topklas-jaore woort um 't gans amateurkampioensjap gespäöld tösse de kampioene vaan de zaoterdag- en de zondagcompetitie. Me kós daomèt promotie nao de Ierste Devisie aofdwinge, meh dao woort gemeinelek gei gebruuk vaan gemaak; 't speule um 't amateurkampioensjap waor veural 'n traditie die in de Hoofklas al bestoont. In de Daarde Devisie is dat neet mie nujeg: bei kampioene promovere en de grens tösse amateur- en profvoetbal is neet zoe sjerp mie. De amateurkampioene zien hei-oonder vet gezat.

Sezoen Zaoterdag Zondag
2010/11 IJsselmeervogels FC Oss
2011/12 SV Spakenburg Achilles '29
2012/13 VV Katwijk Achilles '29
2013/14 SV Spakenburg AFC
2014/15 Kozakken Boys FC Lienden
2015/16 Excelsior Maassluis FC Lienden
2016/17 IJsselmeervogels ASV De Dijk

Limbörgse teams[bewirk | brón bewèrke]

In de Daarde Devisie vaan 2016/17 kump ei Limbörgs team oet: EVV oet Ech späölt in de Daarde Devisie Zondag. Teveure kaom dit team al oonaofgebroke in de Topklas oet.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Daarde_Devisie&oldid=414791"