Tom Dumoulin

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Tom Dumoulin veuraofgoond aon de Runde vaan Fraankriek 2015.

Tom Dumoulin (Mestreech, 11 november 1990) is 'ne Nederlandse fietserenner. Sinds 2017 fiets 'r veur Team Sunweb.

Leve[bewirk | brón bewèrke]

Dumoulin begós pas op zie vieftiende mèt fietserenne. Nao zie diploma gymnasium in 2009 wouw heer medicijne goon studere, meh wie heer daoveur woort oetgeloot, besloot heer veur de sport te goon. In 2010 wón heer al de GP vaan Portugal oonder de 23, en deeg heer mèt aon de Runde vaan Italië veur belofte, boe heer d'n tiedrit won. Dit zouw langen tied zien specialiteit blieve.

In 2013 raakde heer breier bekind wie heer op 't NK fietserenne de broonze medaaje in d'n tiedrit en de zèlvere in de weegwèdstrijd pakde. Ouch deeg heer dat jaor de Runde vaan Fraankriek en d'n Eneco Tour. In 2014 haolde heer zien ierste seniore-euverwinning, en wel in d'n tiedrit vaan 't Criterium International. Ouch wón heer op 't NK d'n tiedrit, en deeg 'r weer aon de Runde vaan Fraankriek en d'n Eneco Tour mèt, zoewie aon 't WK.

't Jao dao-op verzwoerde Dumoulin zie program aonzeenlek. Heer presteerde good in d'n Tour Down Under en in de Runde vaan Zwitserland, boe heer daarde woort. In de Runde vaan Fraankriek mós heer evels mèt 'n blessuur oetvalle. Zier väöl indrök maakde heer in de Runde vaan Spaanje, boe heer twie kier de roejen trieko pakde. In de veurlèste rit raakde heer zien positie evels kwiet aon Fabio Aru; heer indegde oeteindelek es zèsde. Umtot heer es ierste Nederlander in langen tied 't klassemint vaan 'n groete runde had aongeveurd, haolde heer veural in eige land väöl media-aondach.

Op 6 mei 2016 won heer de ierste etap vaan de Runde vaan Italië, die dat jaor in Nederland startde. Heer wis de raozen trieko e paar daog te hawwe, meh mós in de èlfde etap door 'n blessuur opgeve.[1] Datzelfde jaor startde heer ouch in de Runde vaan Fraankriek, boe heer de 'keuninginnerit' nao Andorra[2] en de tiedrit wis te pakke.[3] Oetindelek mós heer door 'ne val ouch in de Tour opgeve. Oondaanks de polsblessuur die heer dao-aon euverheel, kós heer wel op de Olympische Speule in Rio de Janeiro starte; heer haolde de zèlvere medaje in d'n tiedrit (achter Fabian Cancellara).

In de Runde vaan Italië vaan 2017 kaom heer in d'n ierste tiedrit bovenaon te stoon. Ouch in de Alpe heel 'r ziech good, al leep 'r oetindelek wel 'ne kleinen achterstand op. In d'n aofsletenden tiedrit haolde heer zien concurrente weer in. Heimèt woort heer d'n ierste Nederlander oets dee de Giro won, en d'n ierste sinds 1980 dee ein vaan de groete rundes won. Zien optrejje baarde opzien in de fietsrenwereld. Datzelfde jaor won heer es ierste Nederlandse maan 't WK tiedrije in Bergen (Noorwege). Hei versloog hei mèt euvermach concurrente wie Froome en Martin.

't Jaor dao-op deeg Dumoulin zoewel mèt aon de Runde vaan Italië es de Runde vaan Fraankriek. In allebei woort heer twiede, achter respectievelek Froome en Thomas. Heer concludeerde tot 't vare vaan d'n Giro häöm in d'n Tour krach had gekos; veurtaon zouw heer allein de Runde vaan Fraankriek nog doen.[4]

Bronne[bewirk | brón bewèrke]

Dit artikel is gebaseerd op zie Nederlandstaoleg equivalent, en wel in dees versie.

Referenties[bewirk | brón bewèrke]

  1. Nu.nl - Dumoulin geeft door zitvlakblessure op in elfde etappe Giro d'Italia
  2. Nu.nl - Dumoulin soleert naar zege in zware bergetappe Tour de France
  3. Nu.nl - Dumoulin oppermachtig in tijdrit, Mollema stijgt naar tweede plaats
  4. Nu.nl - Dumoulin richt zich in 2019 waarschijnlijk alleen op Tour de France
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Tom_Dumoulin&oldid=428392"