Thessaloniki (stad)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Veendel vaan Thessaloniki

Ligking vaan Thessaloniki

Thessaloniki (Nuigrieks: Θεσσαλονίκη) is 'n stad in Griekeland en de hoofplaots vaan Thessaloniki (departemint) en de periferie (regio) Middel-Macedonië. Ze steit ouch bekind es de hoofstad vaan Grieks-Macedonië, 't gaans gebeed dat in totaol oet de periferieje Wes-Macedonië, Centraol-Macedonië en Oos-Macedonië. Evels heet dit gebeed gein officiële beteikenis. Grieks-Macedonië is inkel 'n culturele streek. De stad heet op ziechzelf volges de census vaan 2011 322.240 inwoeners. De agglomeratie heet oongeveer 790.824 inwoeners. Op Athene nao is 't de groetste stad vaan Griekeland. Dèks weurt Thessaloniki ouch Saloniki, Salonika of Salonica geneump.

Demografie

In 2001 had Thessaloniki 383.967 inwoeners en 'n sjatting vaan 2007 zag tot Thessaloniki nog mer 348.920 inwoeners had. Dit zaw beteikene tot de stad mèt 'n extreme krimp te make had. In 2011, wie 'n nuie bevolkingstèlling woort gedoon in de stad, bleek de krimp nog erger es gedach: 't goof nog mer 322.240 lui in de stad. Dewijl in 2007 't aontal inwoeners vaan Groet-Thessaloniki nog roond de 800.000 woort gesjat, bleek dat noe ouch väöl minder: 790.824. De metropool Thessaloniki heet volges de census vaan 2011 1.104.460 inwoeners. De groete krimp weurt veural es e rizzeltaot gezeen vaan de aonhawwende Eurocrisis. Väöl lui in Thessaloniki zien noordweerts Europa ingetrokke.

Klimaot

De stad ligk in e mediterraon klimaot. Dit beteikent dus milde winters en werm zomers. In de zomer vèlt hei evels mie rege daan in de mieste Griekse plaotse.

Maond	Jan	Fib	Mee	Apr	Mei	Jun	Jul	Aug	Sep	Okt	Nov	Dec
Hoegste temperatuur [°C]	12	13	16	18	23	28	31	30	26	21	15	13
Liegste temperatuur [°C]	5	6	6	9	12	16	18	18	15	11	6	7
Rege (mm)	40	38	43	35	43	30	22	20	27	45	58	50
Record wermte [°C]	20	22	25	31	36	39	42	39	36	32	27	26