Valentiensdaag

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

roa roaze

Valentiensdaag ies 'ne fièsdaag dae gehoute weurt op 14 februari. 't Ies van oarsjróng 'n Ingelsj gebruuk. Leefdespare geve ziech op dezen daag get miè aandach in de vörm van ’n kaart, e bleumke of ’n ander gepas cadeau. In de 14e ièw waor ‘t ’t fiès van verloofde sjtèlle. Verloofd zin beteikent, dat me ziech ónderein haet belaof mèt ein te zölle trouwe. De tegewoordige cultus ies begoes in Amerika en saer de jaore 90 van de veurige ièw commercieel ’n succes.

’n Vergeliekbaar gebruuk in Limburg vreuger waor dat van de meileefste, op 1 mei, es de jónges ziech ónderein de meileefste, de huwbaar maedsjes in 't dörp, verdeilde.

Gesjiedenis

Dao besjtoon twiè heilige mèt de naam Valentien. Eine waor preester in Roame, d'n andere biesjop van Ternis. Allebei zint ze in de 3e ièw op 14 februari vermaord. Mesjiens geit 't hie um ein en dezelfde persoon. Wat hun leve betref wies nieks nao 't leefdesleve van jóng luuj.

Legende

'n Legende vertèlt dat Valentien dokter waor. Es luuj häöm um raod kaome vraoge deilde hae blome oet. Nao zienen doad kreeg 'n blind maedsje 'ne breef van Valentien mèt 'n bloom d'r in. Bie 't opemake koes 't maedsje inins wir zeen! 't Gebruuk um blome te geve op deze fièsdaag zou hie op truuk goon.