Selinunt

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De gerestaureerdje Tempel E.
De fries van Tempel E.

Selinunt of Selinus (Italiaans: Selinunte, Aadgrieks: Σελινούς "Selinous") is 'n aaj stad op 't eilandj Sicilië. 't Is de Griekse stad die 't meiste nao 't wèste loog ane zuudkus van Sicilië. Ze loog óngevieër tachetig kilomaeter t'n wèste van Akragas (Agrigento). Róndj 650 v.Chr. woort ze gestif door e gruupke aan koloniste oet Megara Hyblaea, volges de euverleivering aangeveurdj door 'ne zeker Pammilus, en dank ziene naam ane wilj siljerie (Apium graveolens L., in 't Grieks σέλινον), 'n plantj die väöl veurkoom inne ómgaeving en ouch oppe muntje vanne stad woort aafgebild.

Gesjiechte[bewirk | brón bewèrke]

Tiejes de ieëste 150 jaor van zie bestaon raakdje de stad döks betróch bie kónflikte, zowaal mit ziene naordelike naober Segesta es mit Carthago. Inne Slaag bie Himera (in 480 v.Chr.) sting Selinunt nag, es ènsigste Griekse stad, ane kantj van Carthago, meh toch woort ze in 409 v.Chr. verinneweerdj dore Carthagers. E deil vanne 25.000 inwoeaners woort doe es 'ne slaaf verkóch en tródsdet de stadsmoere kórt dao-op woorten herboedj bleef de historische rol van Selinunt oetgespeeldj. Naodet 't in 250 v.Chr. oppernuuds dore Carthager woort aangevalle, bleef 't es 'n beteikeniserm plaats doorbestaon.

Opgravinge[bewirk | brón bewèrke]

De antieke stad kós pas inne zèstieëndjen ieëf woorte geïdentificeerdj. Opgravinge saeren ènj vanne neugetieëndjen ieëf höbbe ónger anger wichtige reste van zès groeate Dorische tempels aan 't leech gebrach, daterendj vanne zeuvendjen toete viefdjen ieëf veur Christus. 'n Aantaal aan metope hievan zeen kónshistorisch gezeen hieël waersvól en bevinje zich noe in 't Museo Nazionale Archeologico van Palermo. Veural de zoeageneumdje Tempel E oet zoeaget 460 v.Chr., meugelik gewiedj ane gaodin Hera, is innen twintjigsten ieëf deils gerestaureerdj gewaoren en maak groeaten indrök.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Selinunt&oldid=370782"