São Paulo

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


'n Käör aon stadsgeziechter oet São Paulo. Vaan bove nao oonder: Sint-Paulskathedraol, Handelscentrum vaan de VN, Kunsmuseum vaan São Paulo, Museo Paulista, Bandeiras-monumint, Oliveirasbrögk, oetziech vaanaof 't Arantesgebouw.

São Paulo is de groetste stad vaan Brazilië en de hoofstad vaan de gelieknaomege staot. De bevolking woort in 2014 gesjat (geplot) op 11.967.893; mèt de ganse agglomeratie kump de bevolking op 21 mieljoen oet. Heimèt is 't neet allein de groetste stad vaan Brazilië, meh ouch ein vaan de groetste op de wereld. Veural de economische beteikenis vaan São Paulo is zier groet. De vesteging vaan väöl multinationals vertaolt ziech in 't groet aontal wolkekretsers (oonder mie aon de Avenida Paulista) wat 't stadsgeziech domineert (zuug heineve). Daotössedoor kin me evels nog väöl aw barokgebouwe vinde.

São Paulo geit trök op 't Colégio de São Paulo de Piratininga, e jezuïetecolleesj wat hei in 1554 gestiech woort en aon d'n H. Paulus woort gewijd. Um dat colleesj heer oonstoont e dörpke, São Paulo dos Campos de Piratininga, later aofgekort tot São Paulo. De stiechting vaan 'n Europees dörp tientalle kilometers landinwaarts waor 'n unicum, umtot alle Europese nederzèttinge vaan beteikenis aon zie laoge. Daobij waor Zuid-Brazilië ouch väöl dunner bevolk en minder welvaorend es 't noorde. Pas tegen 't ind vaan de zeventienden iew kaom 't oet zien isolemint. In 1690 woort in 't binneland goud oontdèk, en de koms vaan massa's goudzeukers (bandeirantes) maakde São Paulo, wat op de weeg vaan havestad Santos nao 't binneland laog, intrèssant es woenplaots. Wie later de goudzeukers euvergónge op landbouw, woort de stad 'n belaankrieke merretplaots. Tegen 't ind vaan de negentienden iew kaom de industrie op. Dit trok immigrante vaan euver de ganse wereld aon; hei-aon daank de stad häör diverse populatie mèt oonder aandere Japaneze, Italiaone, Arabere en joede. De industrie en later deenste bleve immigratie aontrèkke, wat rizzelteerde in e groet aontal sloppewieke (favelas). De groete economische oongeliekheid heet gezörg veur e zier umvaankriek misdaodprobleem.


Wiki letter w.svg  Dit artikel is e sjtumpke. De kans Wikipedia helpe door 't aan te völle

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=São_Paulo&oldid=396669"