Roostere

Dit artikel is gesjreve (of begós) in 't Roosters. Laes hie wie v'r mit de versjillende saorte Limburgs ómgaon.

---

Roostere (Nederlands Roosteren) is 'n dörp in 't zuudweste van de Nederlands-Limburgse gemeinte Ech-Zöstere, tegeneuver Mezeik op 't Belsj. Op 1 januari 2005 houw de kern 1558 inwonende luuj. De dörper Illekaove en Vèsjerswaert waere ouch biej de kern Roostere geraekend.

De plaats haef väöl monumènte en väöl greun. Vèsjerswaert is tot besjermp dörpsgezich verklaord.

Roostere, wat moot waere verklaord es Rood-Zöstere, óntsjtóng aan de samevleujing van de Gelaenbaek en de Roje Baek en wurt dinkelik begin achste ieaw vanoet de abdij van Zöstere óntgónne. In de dertieënde ieaw wurt 't aevels pas vermeldj. In 1243 bliek 't bezit te zeen van graaf Adolf van Altena, dae 't dan aan de graof van Gelder verkoch. Tot 1982 woor Roostere 'n zelfstenjige gemeinte, die det jaor in Zöstere opging. Saer 2003 huuërt Roostere bij de gemeinte Ech-Zöstere.