Riekswaeg 68
Dit artikel is gesjreve (of begós) in 't AGL. Laes hie wie v'r mit de versjillende saorte Limburgs ómgaon.
Riekswaeg 68 (ouch bekind es: A68/N68) waor 'ne riekswaeg in Limburg, dae van Wieërt nao de Duutsje grens kórtbie Azeraoj leep. De waeg is huuj in behaer van de provincie Limburg en is bewaegwiezerd es N280. In de jaore '70 van d'n twintigsten iew woort de waeg tösje Baoksem en de krusing mit de St. Wirosingel in Remunj, destieds bewegwiezerd es N271, ómgeboewd tot autobaan. Me heelt toen ouch raekening mit d'n aanlègk van de A73. Me zuut det huuj nog ummer aan de zier brei vörmgegaeve aafsjlaag bie Hale. Dae kós dan gemekkelik tot e klaverblaad waere ómgeboewd, veur 't geval det d'n A73 op de linkerover van de Maas zouw waere aangelag. Wies 1993 had det sjtök de sjtatus van 'n autobaan.
In detzelfde jaor woort de waeg tösse Wieërt en Remunj ouch euvergedrage aan de provincie. 't 3,5-kilomaeter lang sjtök t'n oeste van Remunj waor nog wies 2007 bewaegwiezerd es N68. De waeg woort toen neve 't ouw tracé ómgeboewd tot 'nen autowaeg. De ouw N68 is dao euvergedrage aan de gemeinte.
Wies 1976 huurde ouch e deil van d'n A2 tösje Eindjhove en Wieërt tot de A68. Bie Wieërt waor de sjnelwaeg óngerbraoke. 't Verkier mós door de sjtad. Bie Ni-jwieërt góng de sjnelwaeg wiejer nao Mesjtreech, mer droog de naam A75. In 1989 woort 't Sjlingertracé aangelag t'n noorde van Wieërt. 't Goof vanaaf det memènt 'nen ónóngerbraoke sjnelwaeg van Eindjhove nao Mesjtreech, dae huuj dös d'n A2 heit.