Pseudohydromys
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Pseudohydromys is 'n geslach van knaagdiere oet de muusn en ratte van de Aaj Waereld det veurkömp in de berg van Nuuj-Guinea. Dit geslach is waorsjienlik 't nèjs verwantj mit Leptomys en de ónechte waterrat (Xeromys), wo mit 't de Xeromys-divisie vörmp.
Hoewaal de vief saorte van 't geslach toet 2005 in versjèllendje geslachte waerde geplaats, lieke ze toch zeer sterk op elkaar. 't Zeen allemaol kleine, spitsmoesechtige, insecte aetende muus mit 'ne dichte, fluweelechtige vach die in bergraengewoude laeve. Häör sjedele zeen zeer geliekendj. Ze höbbe allemaol de dèrde kies verlaore. Immunologisch zeen ze veur zover bekindj identiek. De kop-romplèngdje bedreug 70 toet 104 mm, de stertlèngdje 78 toet 107 mm, de achtervootlèngdje 17,9 toet 22,7 mm, de oearlèngdje 9,0 toet 12,7 mm en 't gewich 13 toet 29,5 gram.
d'r Zeen vief saorte:
- Pseudohydromys ellermani (vreuger in Mayermys)
- Pseudohydromys fuscus (vreuger in Neohydromys)
- Pseudohydromys germani (vreuger in Mayermys)
- Pseudohydromys murinus (vreuger ouch al in Pseudohydromys)
- Pseudohydromys occidentalis (vreuger ouch al in Pseudohydromys)