Portugees hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Portugees voetbalèlftal, bijgenaomp A Sele(c)ção, vertrejt Portugal op internationaol voetbalwèdstrije. 't Weurt gereguleerd door de Portugees voetbalfidderatie (FPF). 't Land späölde langen tied 'n besjeie rol in 't interlandvoetbal, meh heet ziech vaanaof 2000 oontwikkeld tot ein vaan de bèste teams vaan de wereld of in eder geval vaan Europa. Per juni 2016 steit 't land op de achste plaots vaan de FIFA-Wereldraanklies; de hoegste positie die 't land gehaold heet is de daarde.

Historie

't Portugees èlftal woort betrèkkelek laat geformeerd, in 1921. D'n iersten interland waor tege Spaanje, boetege ze mèt 3-1 verlore. 't Land sjreef ziech in veur 't WK vaan 1934, meh woort in de veurrundes kansloes door Spaanje oetgesjakeld. Ouch 't WK vaan 1938 haolde ze neet. Nao d'n Twiede Wereldoorlog stoont 't Portugees voetbal zoe meugelek nog slechter deveur: 'nen oefematch tegen Ingeland in 1947 woort mèt 0-10 verlore.

De ierste successe kaome in 1966, wie 't team ziech veur 't iers veur e WK plaotsde en zelf daarde woort. 't Succes waor veur e groet deil te daanke aon staarspeuler Eusébio. Oondaanks tot dee bij de selectie bleef, kós Portugal ziech de jaore dao-op neet kwalificere. Witte raof waor 't bereike vaan de haaf finaal in 't EK vaan 1984, wat direk gevolg woort door 'n oondermaots optrejje op 't WK vaan 1986.

Pas in 1996 wis Portugal ziech weer veur 'n indtoernooj te plaotse, 't EK in Ingeland. 't Doa-opvolgend WK in Fraankriek vaan 1998 woort zjus neet gehaold. Groeten indrök maakde 't land op 't EK vaan 2000. Intösse waor 'n ganse generatie vaan staarspeulers opgestande, gans in 't bezunder Luís Figo. Op 't EK vaan 2004, gespäöld in eige land, waor 't team de topfavoriet, meh in de finaal lag de ploog 't aof tege Griekeland. In 2006 wis 't land de veerde plaots op 't WK te hole. Zjus wie de generatie vaan Figo laankzaamaon op leeftied raakde, stoonte ouch weer nui stare op. De bekindste oonder hun is Cristiano Ronaldo, dee Figo in 2016 zouw euvertrèffe es recordinternational. De prestaties waore wisselend tot 't aontrejje vaan Fernando Santos in 2014. Mèt 'n sterk verdeidegende späölstijl maakde heer Portugal in 2016 Europees kampioen. Op 't WK vaan 2018 kaom heer evels neet wijer es de achste finaal, oondaanks diverse gole vaan wereldstaar Cristiano Ronaldo. In 2019 woort Portugal d'n ierste kampioen vaan de UEFA Nations League. Op 't EK vaan 2018 waor Ronaldo in vörm, meh kaom Portugal weer neet wijer es de achste finaal, boe-in 't vaan 't Belsj verloor.