Petrus Augustus de Génestet

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Portrèt vaan P.A. de Génestet.
Henriette Bienfait, gesjèlder door häöre sjoennoonk Jan Adam Kruseman, mèt 't debuut vaan häöre maan in de hand.

Petrus Augustus de Génestet (Amsterdam, 21 november 1829 - Rozendaal, 2 juli 1861) waor 'ne Nederlandsen diechter en theoloog.

Biografie[bewirk | brón bewèrke]

De Génestet verloor op joonge leeftied zien awwers en góng inwoene bij ziene noonk, de sjèlder Jan Adam Kruseman. Heer leet ziech aon 't Atheneum in Amsterdam en 't remonstrants simmenarie tot dominee vörme en woort in 1852 iers in Moordrecht, daan in Delft berope. Datzelfde jaor trouwde heer in Bloemendaal mèt Henriette Bienfait, en brach heer zie debuut Eerste gedichten oet. Henriette en heer zouwe veer kinder kriege.

In 1859 storve zien vrouw en eint vaan zien kinder aon de tering. Zelf had heer dao toen ouch al las vaan; daorum naom heer oontslaag es predikant. Zien lèste jaore brach heer veural in Amsterdam ('s winters) en Bloemendaal ('s zomers) door. In 1861 storf heer in Rozendaal (provincie Gelderland), boe heer ouch begrave ligk.

Werk[bewirk | brón bewèrke]

De Génestet weurt dèks tot de domineesdiechters gerekend, umtot heer dat vaan beroop waor. Zie werk is evels wezelek aanders es dat vaan Bilderdijk of Beets. Dit hingk same mèt ziene remonstrantse, vrijzinnegen achtergroond. Väöl vaan zie werk is satirisch vaan aard; dèks (neet ummer) in de vörm vaan epigramme. Daoneve sjreef heer ouch euver historische en religieus oonderwerpe, wie in zienen tied gebrukelek waor. Veur 't historisch werk leet heer ziech door Lord Byron inspirere. Bekind is noe veural nog 't gediech "Boutade", boe-in heer ziech euverdreve aofzèt tegen 't Nederlands klimaot.

De Génestet stoont bij leve in hoeg aonzien. Zelfs Conrad Busken Huet, 'ne criticus dee normaal zier wieneg mèt Nederlandse diechters op had, waardeerde zie werk en heel 'n touwspraok op zien begraofenis. Ouch nao zienen doed bleef heer nog laank populair; pas nao d'n Oorlog raakde heer vergete.

Werkelies[bewirk | brón bewèrke]

Inclusief postuum oetgaves.[1]

  • Eerste gedichten (1852)
  • Leekedichtjens (1860)
  • Laatste der eerste (1861)
  • Over kinderpoëzy (1865)
  • Dichtwerken (verzaomelband, 1869)
  • Sint-Nikolaasavond (1903)
  • Fantasio en de Mailbrief (1911)
  • Nagelaten brieven (1976)
  • Jeugdbrieven (1987)

Bron[bewirk | brón bewèrke]

Dit artikel baseert ziech op 't corresponderend Nederlandstaoleg artikel, en wel in dees versie.

Rifferenties[bewirk | brón bewèrke]

  1. Bibliografie vaan P.A. de Génestet in de Digitale Bibliotheek der Nederlandse Letteren

Extern links[bewirk | brón bewèrke]

Werk vaan De Génestet op de Nederlandstaolege Wikisource