Peter R. de Vries

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Peter Rudolf de Vries

Peter R. de Vries, volledige naam Peter Rudolf de Vries (Aalsmeer, 14 november 1956) is 'ne Nederlandse misdaadverslaaggaever mit 'n eige televisieprogramma.

De Vries speurde Heineken-ontveurder Frans Meijer op in Paraguay, zoot zich in veur de Twieë van Putten en onthulde det Mabel Wisse Smit de crimineel Klaas Bruinsma baeter kós es det ze ieder had toegegaeve. Ouch kreeg d'r de computer van officier van Justitie Tonino in henj, dae achteraaf vol bleek te staon mit kinjerporno.

Laevesloup[bewirk | brón bewèrke]

De Vries gruijde op in Amstelveen. Ziene vader woor directeur van de kruutfabriek Muiden Chemie, en zów tiedes de Twieëde Waereldkrieg emes höbbe doodgesjaote. 't Gezin mit zes kinjer waas gereformeerd meh De Vries mós min vanne kèrk höbbe; hae ging lever nao Ajax.

De Vries volgde de HAVO in Amsterdam-Buitenveldert. Hae vervulde van 1976 toet 1977 zien militaire deensplich bie de Koninklike Landjmach, en waas in dezelfde periode bestuurslid van de Algemene Vereniging Nederlandse Militairen (AVNM). In meert 1978 ging De Vries es verslaaggaever bie De Telegraaf werke, aanvankelik op de redactie in Den Haag (algemeine verslaaggaeverie). Nao 'n jaor waerde hae euvergeplaats nao de redactie in Amsterdam; hae specialiseerde zich den in misdaadverslaaggaeving.

De Vries noom in 1987 ontslaag bie De Telegraaf, en waerde hoofredacteur van waekblaad Aktueel. Hae maakde van dit waekblad 'n misdaadtiedsjrif en loofde in de zaak van 't verdwene maedje Nymphe Poolman 'n beloning van hongerddoezjend guije oet. Ouch werkde hae mit aan 't televisieprogramma Crime Time van Jaap Jongbloed.

Vanaaf 1991 is De Vries zelfstenjig misdaadverslaaggaever. Hae sjrief onger mieë veur 't Algemeen Dagblad en veur 't waekblaad Panorama. Daonaeve is hae presentator en hoofredacteur van 't televisieprogramma Peter R. de Vries, misdaadverslaggever, aanvankelik oetgezonje door RTL4 (vanaaf 1995), en sins 1998 door SBS6. In dit programma behanjelt hae aan misdaad gerelateerde zake, wie moord- en verkrachtingszake, oplichting en kinjerporno. Neet zelje haet dit programma, al den neet mit de verborge camera, geleid toet 't vinje van daders, 't vrielaote van onsjuljige (beveurbeeld in de Puttense moordzaak) en 't achterhaole van gebeurtenisse.

Zien SBS 6-medewerkster Lisette Knoop had 'n liefdesrelatie mit gewaeze Heineken-ontveurder Cor van Hout, 'n jaor veur zien dood.

De Vries reep aafkeurende reacties op den hae bie de dood van Van Hout neet allein 'n rouwadvertentie leet plaatse in De Telegraaf, veur "de meis bezönjere miens dae ich höb ontmoot" (Misdaad brach os same, misdaad trog os oeterein), meh baovedeen 'n toespraak heel tiedes de begrafenis.

Ouch ieder koom De Vries in opspraak. Hae waerde geregeld mit topcrimineel Klaas Bruinsma in 't Amstelhotel gezeen. Volges Bart Middelburg, misdaadjournalist bie 't Amsterdamse daagblaad Het Parool, leet De Vries zich door Bruinsma inkapsele. d'r Volgde 'n smaadproces, det De Vries verloor. In 1995 noom Justitie bie De Vries diskettes mit informatie euver de hasjgroothanjeleer Charles Zwolsman in beslaag, die wore gestaole bie officier van Justitie Jo Valente.

Begin 2006 ging de Vries same mit Wim Dankbaar nao Dallas, Texas om 'n reportage te make euver de moord op President John F. Kennedy. In deze reportage koom onger mieë James E. Files aan 't waord, dae beweert ein van de twieë moordeneers van Kennedy te zeen.

Op 13 september, 2006, waerde de misdaadverslaaggaever same mit collega Kees van der Spek aangehaoje in Oisterwijk nao 'n confrontatie mit 'ne politieagent. Ze höbbe ruum 2 oer vasgezaete op 't politiebureau aan de Ringbaan Zuud in Tilburg. De politie haet proces-verbaal opgemaak veur erfvredebreuk.

Bekinde zake[bewirk | brón bewèrke]

Mabel Wisse Smit[bewirk | brón bewèrke]

In 't naojaor van 2003 brach De Vries de primeur van 't jaor. Op 2 oktober presenteerde hae in zien televisieprogramma 'n ieder opgenaome interview mit Charlie da Silva, 'ne Chileense ex-liefwach van Bruinsma alias De Lange. Da Silva verklaorde det hae Mabel Wisse Smit, de verloofde van Prins Johan Friso, vreuger regelmaotig had gezeen op de reddingboot Neeltje Jacoba wo Bruinsma verbleef: "zij was die wijf van die Lange". Op 9 oktober volgde 'n twieëde oetzending, mit nuuj details en anger getuug. De beide oetzendinge wekde zoväöl consternatie det de regering op 10 oktober bekind maakde veur 't paar gein toestömmingswet te zulle indene. Wen prins Johan Friso hiejop toch mit Wisse Smit trouwde, verloor hae daodoor zien rech op de troon.

Natalee Holloway[bewirk | brón bewèrke]

De Vries maakde in november 2006 'n programma wo in d'r - euveriges zonger daoveur enig bewies aan te veure - Joran van der Sloot besjuldigde van medeplichtigheid aan de verdwiening van de Amerikaanse tiener Natalee Holloway. Joran van der Sloot gooide in januari 2008 nao 'n aaflevering van Pauw & Witteman De Vries 'n glaas wien in 't gezich.

Op 31 januari 2008 maakde De Vries bekind de zaak 'Natalee Holloway' te höbbe opgelos. Hae haet op 3 februari om halfteen 's aoves in zien eige misdaadprogramma op SBS 6 de oplossing aangedrage. In 't programma wore videobeilde vanne verborge camera te zeen wo op Joran van der Sloot zien betrokkeheid toegoof.

Trivia[bewirk | brón bewèrke]

In 2005 di-j de Vries mit aan ge rally Paries-Dakar, hae góng euvere kóp mer bleef óngedeerdj.

Beuk[bewirk | brón bewèrke]

  • Uit de dossiers van commissaris Toorenaar (1985)
  • De ontvoering van Alfred Heineken (1987)
  • Beroep, misdaadverslaggever (3e dr., 2003)
  • Cipier, mag ik een pistool van u? (1993)
  • Een moord kost meer levens (1994)
  • De moord die nooit mag verjaren, en andere minireportages (2002)
  • Alleen huilebalken hebben spijt (2005)
  • Een crimineel liegt niet altijd... (2006)

Externe link[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Peter_R._de_Vries&oldid=426843"