Pallas (planetoïed)

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Pallas (symbool: ⚴), officieel 2 Pallas geheite, is de twieëdje planetoïed in 't zónstèlsel, zowaal waat betruf de gruuedje es de volgrie van óntdèkking. De planetoïed woort namelik op 28 mieërt 1802 óntdèk door Heinrich Wilhelm Olbers in Breme, naodet Ceres waas óntdèk gewaoren in 1801.

De planetoïed is verneump nao Pallas Athena oete Griekse mythologie; die waas de dochter van Zeus enne besjermgodin vanne stad Athena.

d'n Ómvank van Pallas is mit 582 × 556 × 500 km get grótter es de op twieë nao grótste planetoïed Vesta. Pallas waeg zich in 'n baan rónjelómme zón op 'nen aafstandj van zoeaget 416 miljoen km.

Mit 'n inclinatie (baannieging) van 34,8° is de baan van Pallas rónjelómme zón óngebrukelik hellendj t'n opzich van 't vlaak vanne planetoïdereem en ziene excentriciteit is bao aeve groeat wie die van Pluto. Hiedoor is Pallas betrèkkelik ónbereikbaar veur ruumdjevaartuug.

Tiejes de occultatie van 29 mei 1979 dach me det me-n 'ne kleine maon van 'nen diamaeter van 1 km haw óntdèk, meh det woort neet bevèstig. In 1980 dach me-n 'ne nag gróttere satelliet mit 'nen diamaeter van 175 km te höbbe gevónje, meh dem zie bestaon woort later waerlag.

't Sjemisch element palladium is verneump nao Pallas.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Pallas_(planetoïed)&oldid=453020"