Aorsbik

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Wasseberger, es te dit dialek sjpriks.

---

De Sint-Martinikirk van Aorsbik.

Aorsbik (Duutsj: Orsbeck) is e dörpke inne Duutsje gemèndje Wasseberg, innen deilstaot Naordrien-Wèsfale, en tèltj rónjelómme 2.000 inwoeaners (2006). 't Dörp ligk in 't daal vanne Roer.

t'n Wèste van Aorsbik ligke de uterwaerd vanne Roer inne richting van D'r Oeë en, anen euverkantj vanne reveer, Brehm en Hochbrück, t'n oeaste ligk 't Katsjbrook en e bósgebied, inne richting van Aadmiel, t'n naorde ligk de Mielerbaek, inne richting van Wasseberg, in 't zuje ligke de uterwaerd vanne Roer inne richting van Oberbruch en t'n zuudoeaste ligk Lóchteberg, inne richting van Raotem.

Vónjste en aaj veldjname wiezen op Romeinse beweuning inne buurt van 'ne vaort dore Roer haer. In 1911 woorte oeastelik vanne kaen vreugmiddelieëfse graver gevónje die oete zeuvendjen ieëf stamdje. De bemirkeswaerdigste vónjs waas 'n 5 cm groeate góldsjuufspeldj. Rónjelóm 't jaor 1000 woort 'n Frankische zaalkirk opgerich die aan Maarten van Toer is gewiedj gewaore.

Aorsbik vörmdje vreuger zien eige gemèndje, worónger ouch D'r Oeë en Lóchteberg vele, meh woort op 1 jannewarie 1972 bie Wasseberg ingelief.