Omaha Beach

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


'ne Foto tijes Omaha Beach door Robert F. Sargent, dee bekènd is gaon stoon es Into the Jaws of Death ofwel "Binne de Kakebein vaan d'n Doed"

Omaha Beach, dèks aofgekort tot Omaha, waor 'ne codenaom veur eine vaan de vief sectore vaan de geallieerde invasie vaan de Vereinegde Staote vaan Amerika (VS), 't Vereineg Keuninkriek (VK), Canada en 't Vrij Fraankriek op Nazi-Duitsland tijes d'n Twiede Wereldoorlog in 't door de Nazis bezatte Normandië op 6 juni 1944. De invasie waor, um percies te zien, geloceerd in Sainte-Honorine-des-Pertes, Saint-Laurent-sur-Mer en Vierville-sur-Mer, die allemaol in 'ne regio vaan 8 kilometer ligke aon de Normandische kös, tegeneuver 't Ingels Kanaal en aon de rechterkant vaan de revier vaan de Douve. De landinge waore noedzakelek veur 't VK en de VS um hun soldaote te laote lande op aander plaotse in Normandië, zoonder tot die soldaote zawwe weure aofgesjote door de Nazis.

Sterkde vaan de Geallieerde en de Nazis[bewirk | brón bewèrke]

Aon de geallieerde kant, oonder leiing vaan de Amerikane Omar Bradley, Norman Cota, Clarence R. Huebner en George A. Taylor, bestoond de invasie oet 43.250 soldaote, twie oorlogssjepe, drei cruisers, daartien destroyers en 1.010 aander beut. De naom Omaha Beach is woersjijnlek bedach door Omar Bradley, dee 'ne soldaot had dee ziene basis bewaakde ('ne zekere Gayle Eyler) en vaan orizjien oet 't stedsje Omaha te Nebraska kaom.

Aon de kant vaan Nazi-Duitsland, oonder leiing vaan Dietrich Kraiss en Ernst Goth, goof 't 7800 soldaote, ach artillerie bunkers, 35 normaal bunkers, zès mortierputte, 18 anti-tank-kanonne, 45 rakètwerperplaotse, 85 masjiengeweerplaotse en zès tanktores.

Slachoffers[bewirk | brón bewèrke]

Aon de gallieerde kant vele zeker 2000 doeje, mer sommege historici sjatte 't aontal doeje aon de geallieerde kant bis mie es 5000 ('t is naomelek neet gans en al klaor wienie percies de aander 3000 soldaote hiemelde; umtot 't ouch nog väöl gevechte in Normandië goof náó Omaha Beach). Aon de kant vaan Nazi-Duitsland goof 't d'rs minder: 1200 slachoffers is dao de sjatting. Rillatief gezien waor 't verlees vaan de Nazis evels gigantisch. De euvergebleve Nazi-soldaote waore mèt väöls te wieneg um nog veulbaar tegekrach oet te oefene contra de geällieerde. Wijers waore väöl sterkdepönte vaan de Nazis op de Normandische kös noe in de han vaan de tegestenders, wie de belaangriek strandbunkers.

Gevolge vaan Omaha Beach[bewirk | brón bewèrke]

6 juni 1944, d'n daag vaan Omaha Beach, góng bekènd stoon es D-Day. Op deen daag lökde 't de geallieerde same mèt soldaote (boevaan väöl vrijwèllegers) oet Australië, Tsjechoslowakije, Pole, Noorwege, Nui Zieland en Griekeland um 't gevech contra Nazi-Duitsland te beginne op 't vasteland vaan Wes-Europa.

Vaanaof juli dat jaor begoste ummertouw mie stei en dörper in Fraankriek in de hen te valle vaan de geallieerde. Ouch de Limbörge woorte in deen tied bevrijd vaan de Nazis. Pas op 5 mei 1945 zawwe de Nazis hun waopes laote valle in Wes- en Noord-Nederland. Op 23 mei dat jaor zou Nazi-Duitsland officieel ophawwe te bestoon.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Omaha_Beach&oldid=449953"