Noordwijks
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Noordwijks (Noorteks) is 't Hollands dialek wat vaanajds in 't dörp Noordwijk, specifiek in Noordwijk-aan-Zee, weurt gesproke. 't Dialek is sterk verwant aon 't Katwijks, en in minder maote ouch aon 't Zandvoorts en Schevenings. 't Versjèlt dujelek vaan de dialekte oet 't achterland, die väöl korter bij 't Algemein Nederlands stoon, al heet 't plat vaan Noordwijkerhout nog wel opvallende euvereinkomste mèt 't Noordwijks.[1]
Zjus wie 't Katwijks weurt in 't Noordwijks nog versjèl gemaak tösse de lang ij en korte ei (boebij de lèste wie 'aai' klink), wie ouch tösse de sjerp- en weiklang ee en oo. De aa weurt get geslote tot ae (al sjijnt dat minder wied te gebäöre es in 't Katwijks), de w klink 'Ingels' oe-echteg ([w]). De o veur e in wäörd wie dorde, vors en Korsemis, kinmerkend veur de awwerètse Zuid-Hollandse dialekte, kump ouch hei nog veur.
Belaankrieke versjèlle mèt 't Katwijks zien 't oetvalle vaan de h- (zjus wie in 't Schevenings en Egmonds) en de klaank vaan de sjerplang ee. In 't Katwijks is dee klaank bekaans of zelfs gans (zuug 't artikel) mèt de historische aa samegevalle, zoetot raep 'reube' en ràèp 'reip, touw' zoeget geliek klinke. In 't Noordwijks weure die twie dujelek oeterein gehawwe (raep, reêp). In de woordesjat zien ouch get klein versjèlle aon te wieze. Es typisch Noordwijks woord weurt keun geneump, wat me in Noord-Holland es kuin kint en 'leuk', 'sjiek' wèlt zègke.[2]
Wieväöl lui nog Noordwijks spreke is neet bekind. 't Vèssersleve is hei evels al hiel laank neet mie vaan beteikenis, wat normaal gezeen beteikent tot 't dialek sterk in verval moot zien. Wel zien sommege Noordwijkse wäörd, boe-oonder de plaotseleke dörpsnaom Noortek/Noorteg, bij väöl mie lui nog in gebruuk.
Rifferenties
[bewirk | brón bewèrke]- ↑ Dichtbij.nl - Trots op het Noordtukkerhouts
- ↑ Cor van Bree, Taal in stad en land: Zuid-Hollands, Sdu Uitgevers, Den Haag, 2004: p. 103