Miele
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Mieles, es te dit dialek sjpriks.
Miele (Nederlands: Millen) is e dörp in Belsj Limbörg en 'n deilgemeinte vaan Riems. De deilgemeinte, boe ouch de gehuchte Dries (noorde) en Els (zuie) bij hure, had in 2008 1.489 inwoeners.[1] 't Dörp ligk e paar kilometer zuielek vaan Genoens, neet wied aof vaan d'n Tóngersesteinweeg. Miele ligk in Druug Haspegouw en is heuvelechteg: kortbij Els ligk 't hoegste punt vaan Belsj Limbörg (boete Voere) op 151 meter.
In Miele steit de neogotische Steffeskèrk oet 1861 mèt gotischen torie oet de zestienden iew (foto)[2] zoewie versjèllende carréhäöf. Bij 't dörp steit de Waterbörch.[3]
Miele woort in 1143 veur 't iers geneump, en wel es Milina. 't Waor iewelaank es hierlekheid in 't graofsjap Loen. Ze waor in han vaan versjèllende femilies, in 't begin vaan de hiere vaan Miele (de Milne, de Melin), later vaan aander geslachte. Vaan 1456 tot 't ind vaan 't Ancien Régime waor Miele bezit vaan de hiere van Mettekaove. De kèrkeleke rechte euver de parochie Miele, boe ouch Val en Meer oonder vele, waore sinds d'n tienden iew al in han vaan 't Luiker Martinuskapittel. Oonder Frans bewind, tösse 1796 en 1802 waor Miele hoofplaots vaan e kanton, boe nog 19 umligkemde dörper bij hoorte. Tot 1977 waor Miele 'n apaarte gemeinte.[4]
Referenties[bewirk | brón bewèrke]
- ↑ Parochie Miele op site dekenaot Vlietege
- ↑ Inventaris onroerend erfgoed - Parochiekerk Sint-Stefanus (ID: 36963)
- ↑ Gemeente Riemst - Waterburcht van Millen
- ↑ Gemeente Riemst - Millen
| |
|---|---|
| Deilgemeintes, dörper en gehuchte:
Genoens · Joddere · Kan · Memmerke · Miele · Riems (Heukelóm) · Val (Meer) · Vlèètege (Laofelt) · Vroenhove · Zèche-Zösse-Boolder (Boolder · Zèche · Zösse) | |