Memmerke

Van Wikipedia
Naar navigatie springen Naar zoeken springen
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Memmerkes, as te dit dialek sjpriks.

Hubertuskèrk vaan Memmerke mèt melgeren torie.

Memmerke (Nederlands: Membruggen) is e dörp in Belsj Limbörg, 'n deilgemeinte vaan Riems, kort noordelek vaan Genoens en zuielek vaan Rèkkeve. In 2005 had de deilgemeinte 812 inwoeners. Memmerke ligk es eineg dörp in de gemeinte Riems neet in Druug meh Vochteg Haspegouw, zoetot de natuur um 't dörp heer wezelek aanders is.[1] Bij Memmerke hei oontspringk de Meulebeek, 'ne zijbeek vaan d'n Demer. De parochiekèrk (zuug de foto) is 'n neoromaanse pseudobasiliek gewijd aon Sint-Hubertus oet 1872, op de plaots vaan 'n väöl awwer kèrk. D'n torie vaan de aw kèrk veel in 1727 in; vaan de nuien torie dee me dao-op bouwde zien nog stökker in de huiege kèrk bewaord.[2]

Memmerke, boe al in de Romeinsen tied 'ne villa stoont, weurt in d'n daartienden iew veur 't iers geneump es de groethierlekheid Meummerken. Later kump 't nog veurbij es Membrughes (1356) en Mommerken (1985). D'n dialeknaom heet dus de awwer pepiere. Bei naome laote ziech verklaore oet meer en brook ('moeras'), wat wijs op de vochtege bojem hei (in tegestèlling tot de zuieleke umgeving, zuug bove). 'n Awwer verklaoring góng evels oet vaan 'gemein brögk'.[3] De groethierlekheid laog in 't Graofsjap Loen, meh ressorteerde sinds 1366 oonder Luik. Ouch de abdij vaan Horcht had hei väöl bezittinge. Tot 1971 waor Memmerke 'n zelfstendege gemeinte, daonao hoort 't tot 1977 bij Eldere. De nui gemeinte Eldere woort dat jaor weer opgesplits: dewijl 't dörp Eldere nao Tóngere góng, kaom Memmerke wie Genoens in de nui gemeinte Riems te ligke.[4]

Referenties[bewirk | brón bewèrke]

  1. Gemeente Riemst - Wilde dieren en planten
  2. Inventaris onroerend erfgoed - Parochiekerk Sint-Hubertus (ID: 36937)
  3. Plaotsnaome in d'n Haspegouw - Riems
  4. Gemeente Riemst - Membruggen. Een historisch- geografisch portret

Veur dit artikel is wijer gebruuk gemaak van 't corresponderend Nederlandstaoleg artikel.

Externe link[bewirk | brón bewèrke]

Commons
In de categorie Membruggen van Wikimedia Commons zeen media gerelateerd aan dit óngerwerp te vènje
 
Gemeinte Riems
Vaan van Riems
Deilgemeintes, dörper en gehuchte:

Genoens · Joddere · Kan · Memmerke · Miele · Riems (Heukelóm) · Val (Meer) · Vlèètege (Laofelt) · Vroenhove · Zèche-Zösse-Boolder (Boolder · Zèche · Zösse)

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Memmerke&oldid=384064"