Mieëve (Belsj Limbörg)

Van Wikipedia
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Miëves, es te dit dialek sjpriks.

De deils laat-gotische, deils neogotische Martinuskèrk in Mieëve.

Mieëve (ouch Miëve gesjreve; Nederlands Meeuwen) is e dörp in Belsj Limbörg en 'n deilgemeinte vaan Audsberge. 't Dörp had in 2007 5.462 inwoeners. Mieëve ligk op 't Kempes Plateau, kortbij 't nationaol park de Hoeg Kempe.

Historie[bewirk | brón bewèrke]

Me heet in Mieëve al spoere gevoonde vaan bewoening door Neanderthalers in 't Paleolithicum. Permanente bewoening kaom in 't Neolithicum op. Oet de broonstied gief 't oonder mie reste vaan e graaf en 'ne rinkwal. Die reste vint me veural oostelek vaan d'n dörpskern, op de druger en hoeger gelege grun. 't Huieg dörp is joonger, en oontstande es bebouwing aon d'n Aobeek.

De ajdste vermelding vaan 't dörp dateert vaan 1146, in de vörm Meva. Me heet dat in verband wèlle bringe mèt made, in de zin vaan 'veld' (dink ouch aon Made in Noord-Braobant en 't Ingels meadow). Mieëve waor in deen tied bezit vaan de graove vaan Loeën. Iewelaank oontwikkelde ziech 't dörp koelek, umtot me beperk waor tot 't smaal stök bouwland aon de beek en de oonvröchbaar hei economisch neet väöl te beje had. Op 6 december 1648, kort nao de Vrei vaan Munster, leverde de boerebevolking slaag mèt plunderende huurlinge die noe wèrkeloes waore gewore. Deze Sinterklaosslaag leep oet op 'n zwoer slachting. Ouch in d'n Oosteriekse Successieoorlog (1740-48) misdroge soldaote ziech hei zoe tot de boere vlöchde nao Bree of nao de Bernheidesjans.

Tot in d'n twintegsten iew had Mieëve neet al te väöl te beteikene. Door de versteideleking vaan Gènk begós Mieëve ouch e bitteke veurstad te weure, al verloor 't noets ech zie lendelek karakter. In 1971 woort Elekom en Wiesjage bij Mieëve geveug. In 1977 fuseerde Mieëve mèt Roj tot de nui gemeinte Mieëve-Roj, die in 2019 (nao 'n fusie mèt Glabbek) weer opgóng in Audsberge. Mieëve beheel, neve Glabbek, de status vaan hoofplaots.

Aonzien[bewirk | brón bewèrke]

Mieëve ligk in e sjiek, toeristisch heilandsjap. Zeker de Donderslaagse Hei weurt door väöl toeriste aongedoon, al gief 't dao ouch e militair oefenterrein. In 't dörp vint me oonder mie de Martinuskèrk (ind vieftienden iew; oetgebouwd in de negentienden iew en in 1910 vaan nui toriedeile veurzeen). Ouch gief 't hei twie kepelkes. Op d'n Aobeek zitte nog twie wèrkende watermeules.

Bron[bewirk | brón bewèrke]

Dit artikel is gebaseerd op, meh neet vertaold oet, 't corresponderend Nederlandstaoleg artikel.