Elekom

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Miëves, es te dit dialek sjpriks.

Elekom (Nederlands Ellikom) is e dörp in Belsj Limbörg, in de Limbörgse Kempe, en 'n deilgemeinte vaan Audsberge. Tot 1971 waor Elekom 'n apaarte gemeinte. Elekom had in 2013 1.149 inwoeners.

Historie

Elekom weurt in 'n akte vaan 1314 veur 't iers geneump, es Elleken. De naom is op te vatte wie Ellik(s) heim, 'hoes vaan 't geslach vaan Alja. Dat zouw beteikene tot 't pläötske door de Fraanke is gestiech. Me heet al-evel spore vaan väöl awwer bewoening gevoonde, tot in 't Paleolithicum aon touw.

In de middeliewe en laank daonao waor Elekom e gehuch aon d'n Aobeek, zoonder groete beteikenis. 't Waor bezit vaan de abdij vaan Aldeneik hei kortbij. Juridisch veel 't oonder de sjepebaank vaan Mieëve.

Elekom kaom pas oet zien isolatie wie de stoumtram vaan Leopolsbörch nao Bree veurbij Elekom kaom en 't dörp dao 'n statie aon kraog. Ouch de aonlag vaan nui weeg, die 't dörp verboonde mèt de straotweeg N73, haolden 't oet zien isolatie. Noe gónge ouch get mie forenze in 't dörp woene.

In 1971 woort de gemeinte Elekom opgeluf en bij Mieëve geveug. Dat góng in 1977 zelf weer op in Mieëve-Roj. Sinds 2019 vèlt Elekom oonder de fusiegemeinte Audsberge.

Aonzien

Elekom is e lintdörp, wat ziech aon de Weeg nao Elekom en de Betonweeg hoonderde meters laank oetstrèk. 'ne Wijere weeg is de Brieëgelerweeg.

Elekom ligk op 69 meter huugde in de Kempe. In de umgeving is väöl natuur. 't Fietsroutenètwerk vaan Belsj Limbörg ('t ajdste op de wereld) heet in Elekom zie knouppunt nommer 1.

Elekom had vreuger drei watermeules op d'n Aobeek. Daovaan is noe nog eine euver, d'n Hoeëgmele. 'nen Aandere meule, de Slaagmele, is in 1963 oontmanteld en noe in Bokriek te vinde.

Bij d'n dreisprunk vaan de Weeg nao Elekom, de Betonweeg en de Brieëgelseweeg vint me de modern Harlindis-en-Relindiskèrk, geneump nao de ierste abdisse vaan de Aldeneikse Abdij.