Mexicaans hierevoetbalèlftal

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Estadio Azteca, 't toesstadion vaan 't Mexicaans hierevoetbalèlftal.

't Mexicaans hierevoetbalèlftal vertrejt Mexico in internationaol voetbalmatches. Mexico is lid vaan de CONCACAF, de fidderatie vaan Noord-Amerikaanse voetbalèlftalle. Traditioneel is 't dao wiedoet 't sterkste land vaan, al krijg 't land sinds de jaore negenteg serjeus concurrentie vaan de Vereinegde Staote. Ouch bij 't Wereldkampioensjap, wat 't twie kier heet georganiseerd, is Mexico vaste gas.

Historie[bewirk | brón bewèrke]

't Voetbal woort begin twintegsten iew ingeveurd door oonder mie koompele oet Cornwall, en later door vlöchtelinge oet de Spaonse Börgeroorlog. 't Èlftal späölde zienen iersten officiële match op nuijaorsdaag 1923, tege Guatemala (3-2 wins). Mexico waor presint op de Olympische Speule vaan 1928 in Amsterdam, zoewie op 't ierste WK voetbal in 1930. In deen tied kós 't ziech nog neet mete mèt groete teams oet Zuid-Amerika en Europa. Ouch in de ierste jaore nao d'n Twiede Wereldoorlog maakde 't Mexicaans èlftal neet väöl klaor.

Dit veraanderde in de jaore zèsteg. In 1965 won 't land 't kampioensjap vaan Noord-Amerika, en in 1968 haolden 't bij de Olympische Speule in eige land de veerde plaots. In 1970, bij 't WK wat ouch al in Mexico woort gehawwe, haolden 't èlftal veur 't iers de kwartfinaal. Dit herhaolden 't in 1986, wie 't WK obbenuits in Mexico woort gehawwe. Bij dit WK raakde de 'Mexican wave' euver de ganse wereld bekind.

't Internationaol succes kaom abrup tot 'n ind mèt 't Cachirules-sjandaol. Wie in 1988 de coach te väöl volwasse speulers in 't jäögteam had opgestèld, woort Mexico veer jaor laank vaan alle voetbaltoernoje oetgeslote. Sinds 1994 zien de Mexicaone solide, modaol deilnummers aon de WK's: zeve kier op rij zien ze tot de achste finaal gekoume en dao oetgesjakeld. In de Noord-Amerikaanse kampioensjappe is Mexico oongemein succesvol zien gebleve. Hun groetste succes waor 't winne vaan de Confederations Cup in 1999, alweer in eige land.