Max Verstappen

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


Max Verstappen in 2014

Max Verstappen (Hasselt, 30 september 1997) is 'ne Belsj-Nederlandjse autocoureur. Hae veurt ónger 'n Nederlandjse licentie veur Red Bull inne Formule 1.

Biografie[bewirk | brón bewèrke]

Verstappen woort gebaoren es zoon vanne Nederlandjs-Limbörgse Jos Verstappen, ouch Formule 1-coureur, enne Belsj-Limbörgse Sophie Kumpen, die ouch hoeag haet gekartj. Zoea koom d'r mit zeve jaor zelf al inne kart; hae woort drek Belzje kampioen inne Miniklas. E jaor later herhaoldje d'r det; hae wón doe zelfs alle races. In 2007 woort hd'r kampioen inne hoger Rotax Minimaxklas, ouch weer door alle 'manches' te winne. De twieë jaor dao-op woort d'r kampioen inne Cadètklas.

In 2010 en 2011 kwaam Verstappen oet inne KF3-klas, woveur d'r ouch versjillige kampioensjappe boeten 't Belsj voor en wo d'r in 2011 ouch weer kampioen woort. E jaor later deej d'r zelfs in drie klasse tegeliek starte: KF2, KF1 (de hoogste kartklas) en KZ2 (karts mit handjmaesige sjakeling). Dit jaor haoldje d'r gein kampioensjappe: bieje KF2 woort d'r disciplinair gestraof veur 'n foute manäöver, inme KF1 vool d'r twieë kieër oet en inne KZ2 kwaam d'r tekórt. In 2013 spróng d'r euver nao de KZ1, hie-in woort d'r derdje.

Door Verstappen zien vreugriepheid vónj me det 't tied woor gewaore veur 'm oppe formuulwages te zètte. Al op 18 dieëtsember 2013 maakdje d'er zie tesdebuut inne Formule 3. Aan 't Formule 3-sezoen van 2014 noom d'r mit wusselendj succes deil. Zie talent bleef aevel neet ónopgemirk, en in augustus 2014 woort bekèndjgemaak det Verstappen veur Red Bull móch gaon rieje. Veur percies te zien woort t'r toegeveug aan Toro Rosso, e satellietteam van Red Bull. Hae haoldje flot zien superlicentie en deej op 3 oktoeaber 'n vriej traening bieje Grand Prix van Japan.

Op 15 mieërt, bieje begin van 't Formule 1-sezoen van 2015, debuteerdje d'r es jóngste coureur oeatj (17 jaor en 164 daag) oppe Grand Prix van Australië (in Melbourne). Hae loog oppe neugendje plaats wie d'r oetvool mit moeaterpech. Bieje Grand Prix van Maleisië, op 29 mieërt, ènjigdje d'r es zevendje. Zoea woort t'r ouch de jóngste oeatj dae inne Formule 1 inne puntje voor.[1] Zie grótste succes - de veerdje plaats - haoldje d'r op 26 juli oppe Grand Prix van Hongarieje.[2]

Indj april 2016 stapdje hae euver van Toro Rosso nao 't hoofteam van Red Bull. Zie debuut in dit team maakdje hae op 15 mei op de Grand Prix van Spanje. Hae zat 'n historische prestaasje denieë doear direk te winne; mit 18 jaor woeart hae de jónkste coureur oeatj dae 'ne GP wón (of zelfs mer op 't podium kwaam).[3] Ouch is hae d'n ierste Nederlanjer dae 'ne Grand Prix haet gepak.

Brón[bewirk | brón bewèrke]

Dit artikel baseertj zich op 't corresponderendj Nederlandjstalig artikel, en waal in dees versie.

Rifferenties[bewirk | brón bewèrke]

  1. Nu.nl - Zevende plaats voor Max Verstappen in GP Maleisië
  2. Nu.nl - Verstappen maakt indruk met vierde plaats in Grand Prix Hongarije
  3. Nu.nl - Verstappen schrijft historie met zege in Grand Prix van Spanje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Max_Verstappen&oldid=395790"