Marokkaons hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Marokkaons hierevoetbalèlftal (bijnaom De Liewe vaan d'n Atlas) vertreujt Marokko in internationaol voetbalmatche. 't Team huurt al jaorelank bij de bèste vaan Afrika en vaan d'n Arabische wereld en heet diverse kiere aon 't Wereldkampioensjap hierevoetbal mètgedoon. In 't èlftal höbbe door de jaore heer diverse Marokkaonse Nederlanders gespäöld.
Historie
[bewirk | brón bewèrke]Al in de koloniaolen tied woort e nationaol èlftal geformeerd. Dit kós gein officieel matche speule, meh späölde wel dèks tege aander èlftalle oet 't Frans koloniaol riek. D'n ierste match woort gespäöld op 22 december 1928, tegen e Frans B-èlftal (2-1 verlees).
In 1955, veuroetloupend op de oonaofhenkelekheid vaan 't land, woort 'ne nationaole boond opgeriech. Twie jaor later debuteerden 't team op de Pan-Arabische Speule mèt e 3-3 geliekspeul tegen Irak. In die jaore späölden 't ouch zwoer belaoje vrundsjappeleke matche tege 't team vaan 't FNL, de aofsjeiingsbeweging vaan 't daan nog neet oonaofhenkelek Algerije. 't Land sjreef ziech in veur 't WK vaan 1962 meh kaom in de intercontinentaol play-offs neet veurbij Spaanje. Wel wiste ze in 1961 de Pan-Arabische Speule in eige land te winne.
In 1964 deeg Marokko mèt aon de Olympische Speule, meh zoonder succes. Veer jaor later trok 't ziech trök nao 'n weigering veur tege Israël te speule. De groetste verrassing tot daan touw kaom wie 't land ziech plaotsde veur 't WK vaan 1970. In de grópsfaas haolde ze ei punt; mie waor vaan teväöre ouch neet vaan de Marokkaone verwach. Op de Speule vaan 1972 woort de twiede runde gehaold. Daonao góng 't get op en neer. Groet succes waor 't pakke vaan de Africa Cup in 1976, meh 't gaof ouch jaore tot ze ziech dao gaaroet neet veur kwalificeerde. WK's bleve nao 1970 langen tied boete bereik.
In 1986 braok veur Marokko 'ne bleujtied aon. De gouwe generatie vaan Marokkaonse voetballers stoont op. Op 't WK in Mexico dat jaor woort de achste finaal gehaold. 't Veel daan ouch sterk tege wie 't team ziech in 1990 neet veur 't WK en ouch neet veur de Africa Cup plaotsde en op de Africa Cup vaan 1992 neet wijer kaom es de ierste runde. Ouch op 't WK vaan 1994 vele de prestaties tege: Marokko verloor drei kier (in 'n poule mèt 't Belsj, Nederland en Saoedi-Arabië). Ouch op 't volgend WK woort de knock-outrunde neet gehaold.
In de nuien iew haolde 't team al gaw 'n twiede plaots in de Africa Cup vaan 2004 (in de finaal 2-1 verlees tegen 't gasland Tunesië). Sindsdeen lepe de prestaties sterk trök. In de Africa Cup wis Marokko gemeinelek neet veurbij de grópsfaas te koume. Op 'n nui WK-deilnaome mós 't team wachte tot 2018. 't WK vaan 2022 euvertrof alle verwachtinge. Nao 'n grópsfaas boe-in oonder mie vaan 't Belsj woort gewonne volgde nog winspartije tege Spaanje en Portugal. Oetindelek waor in de haaf finaol Fraankriek te sterk; 't land indegde 't toernooj es veerde. Dit waor neet allein beter es wat Marokko oets had gedoon, meh ouch wijer es n'importe wat veur Afrikaons of Arabisch land oets waor gekoume.