Marco Polo
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Marco Polo (Venies of Korčula, róndj 1254 - Venies, 8 jannewarie 1324) waas 'ne Venetiaansen hanjeleer en óntdèkkingsreiziger. Mit zie vader Niccolò en ome Maffeo Polo bereisdje d'r tösse 1271 en 1295 veur Europa gooddeils ónbekèndje gebiede wie Perzië, Sjina en Indië. Hae wós in deens vanne Mongoolsen hieërsjer Koeblai Khan unieke infermaasje euver Azië te vergaore. Nao zien trögkkóms in Venies besjreef t'r, same mitte romansjriever Rustichello van Pisa, de door 'm bezóchte lenjer in Il Milione (Nederlandjsen titel: De wonderen van de Oriënt). Dit book haw inne late middelieëve groeaten invlood op 't Europees bild van 't oeaste. Marco Polo besjreef de prach en hieërlikheid van Sjina en 't Mongools Riek en vermèldje väöl in Europa ónbekèndje zake wie 't gebroek van pepiergeldj, steinkaol, 't bestaon van Japan en zo wiejer. De door Marco Polo opgedaone geografische kènnis woort gebroek door gerinnemeerdje cartografe en stimuleerdje, ane veuraovendj van 't tiedpirk vanne groeate óntdèkkinge, óntdèkkingsreizigers wie Christoffel Columbus. Regelmaesig zeen twiefele oetgespraoke gewaoren euvere geluifwaerdigheid van Marco Polo zien reizen op gróndj van eweglaotingen en ónjuushejen in 't book, meh de meiste óngerzeukers oeardeile det de groeate wieväölheid aan krekke en verifieerbaar infermaasje bewies det Il Milione waal degelik 'n uniek en waorheidsgetroew document is.