Maondag

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


De maondag is 'nen daag vaan de week. Vaanajds is 't d'n twieden daag vaan de week; door de praktijk in christeleke len om op de zondag te röste is de maondag feitelek d'n ierste weekdag gewore.

De naom maondag is 'n lienvertaoling vaan 't Latiens Lunae dies daan wel 't Aajdgrieks ἡμέρᾱ Σελήνης (hèmera Selènès). De maon waor in 't Ptolemeïsch stèlsel ein vaan de zeve planete. 't Astronomisch symbool veur de maon ☽︎ woort veural vreuger ouch es teike veur de maondag gebruuk. Es gevolg daovaan gelt de maondag al vaanajds es 'nen oongelöksdaag. Maondagskinder zouwe in hun leve väöl oongelök höbbe en 'n groete kans höbbe veur bröl te weure.

Mèt de maondag zien neet väöl religieus gebruke verboonte. Wel höbbe de mierdaogse christeleke fieste Paose en Pinkstere vaste gebruke op maondag (Twiede Paosdaag resp. Twiede Pinksterdaag). In 't seculier leve gelt de maondag dèks es de minsten daag vaan de week, umtot me daan nao e weekend weer moot wèrke. Bris oonderzeuk heet aongetuind tot (in eder geval in Ingeland en Wales) op maondag mie lui zelfmaord begoon es op aander daog, en ouch mie lui ziech deen daag kraank melde.

Kleinhandelere zien op maondagmörge dèks geslote, umtot ze in tegestèlling tot arbeiers en employés ouch op zaoterdag wèrke.

Daag van de waek
maondig · daensdig · goonsdig · dónderdig · vriedig · zaoterdig · zóndig
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Maondag&oldid=429342"