Maog

Van Wikipedia
(Doorverweze van Maagd)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Dit artikel geit euver 'ne persoean (sómtieds in 't biezunjer e vrouwmis) dae gein geslechsbetrèkkinge haet gehadj; veur 't artikel euver 't spiesvertaeringsorgaan, zuuch: maag.

De maog Maria.

'n Maog is 'ne persoean dae gein geslechsbetrèkkinge haet gehadj. 't Waord wuuertj veural gebroek veur maedjes en vrólje. Den wuuertj gezag det die nag "in ónsjöldj verkieëre". 'n Maog kan zowaal gekaoze höbbe gein geslechsverkieër te höbbe gehadj, es ouch oet toevelligheidsraejene noeatj dao-aan te höbbe gedaon, en 't guuef zelfs gedwónge maogdje. Ouch kan emes nag gewuuen maog zeen vanwaengen 'ne jónge laeftied.

In religies höbbe maogdje döks 'n speciaal status.

Belaeving[bewirk | brón bewèrke]

In väöl culturen en geluive, worónger kristelike kirke bie 't protestantisme en 't katholicisme, mer ouch in de islaam en anger godsdeenste, wuuertj e groeat belank gehech ane maogdjelikheid vanne man en/of de vrouw bie 't huwelik. In väöl culture wuuertj aevel tösse de man enne vrouw mit twieë maot gemaete: dao wo van vrólje wuuertj verwach det ze kuus laeven en gein seks veur 't huwelik höbbe, doon väöl manskaerele häör ieëste seksueel ervaring op veur 't huwelik of bie 'n prostituee. 'n Vrouw die veur 't huwelik geslechsgemeinsjap haet gehadj wuuertj dao döks gezeen es "ónkuus", "ónrein" of 'n hoor. Zelfs wen 'n vrouw ónvriewillig häör maogdjelikheid haet verlaore door 'n verkrachting wuuertj ze döks gestigmatiseerdj. In sómmige culture wuuertj aangenómme det ze de verkrachtig zelf haet oetgelok en wuuertj ze verstoeaten es 'n sjanj veure femielje of gedwónge mit häöre verkrachter te troewe. Sómmige stèlle doon veur 't huwelik aan anaal seks ómme maogdjelikheid toet nao 't huwelik te beware.

Ónwaorheje[bewirk | brón bewèrke]

t'n Ónrech wuuertj sómtieds veróngerstèldj det 't bestaon van e maogdjevlees de maogdjelikheid vanne vrouw kan bewieze. Ouch suggereertj naam det 't e vlees betröf, inplaats e rendj weefsel, det bieje ieëste penetratie ummer zów bleuje. E maogdjevlees kan aevel al zeen ingesjäördj door neet-seksueel aktiviteite, wie sport of 'nen helle val van 'ne fietsj. In väöl culture waere de bebleudje lakes nao de huweliksnach gezeen es bewies van maogdjelikheid en wuuertj 'n vrouw die neet bleudj gezeen es emes die al veur 't uwelik seks haet gehadj en daomit ónkuus is. Veur perbleme te veurkómme nump de vrouw döks e klei flesjke dereblood mit det ze tiejes de gemeinsjap euver 't lake geutj. Anger ónwaor bewaering zeen det maogdje minder legen of 'n anger liefsgäör höbbe, det häör vagina strakker is of det me vanne óntmaogdjendje geslechsgemeinsjap neet zwanger kan waere. Sómmige vrólje dörve hiedoor gein tampons te gebroeken en neet te masturbere (veural neet mit hölpmiddele wie dildo's), oet sjrump det häör vagina hiedoor minder strak wuuertj of 't maogdjevlees insjäörtj.

Seksueel revoluusje[bewirk | brón bewèrke]

De seksueel revoluusje haet 'ne groeaten invlood gehadj oppe belaeving van maogdjelikheid. Door baeter seksueel veurlichting zeen väöl ónwaor verhaole ónger mit naam jóngere de welt oetgehólpe. De ról van religie die kuusheid, maogdjelikheid en seks veur 't kriege van kinjer veursting woort trögkgedrónge. Boetedet woorte besjurmings- en anticonceptiemiddele wie de pil en 't condoom almieë geaccepteerdj, wodoor seks almieë get woort óm van te genete zónger aan eventueel gevolge te hove dinke. Hiedoor woort ouch minder lestig gedaon euver maogdjelikheid en seks veur 't huwelik en woort 't ummer gewuuener det me veur 't huwelik ein of mieëder seksuuel relaasjes haw. De laeftied vanne ieëste seksueel ervaring vertuuentj hiedoor in óntwikkeldje lenjer 'nen dalendjen trand.

Hiedoor wuuertj maogdjelikheid ónger jóngere in lenjer wo de seksueel revoluusje is doorgedrónge sómtieds zelfs gezeen es get woveur me zich sjaamp. Seksueel ervaring wuuertj döks gezeen es 'ne steeg nao vólwassenheid. Väöl jóngere en zelfs vólwassene lege daoveur euvere laeftied van häör óntmaogdjing of doon gein maog mieë te zeen dewiel det nag waal zoea is. Angerzieds is ouch 'n taengebewaeging mirkbaar: me vindj geslechsgemeinsjap get det mót blieve gerizzerveerdj veure waor leefdje en det me neet inkel en allein daomit mót beginnen oet sociaal drök van vrunj. Sómmige luuj vinjen 't gein fijn idee wen de partner al hieël väöl seksueel relaasjes haet gehadj. Anger luuj waorsjoewe veur eventueel gevolge wie SOA's en óngewunsdje zwangersjappe. Wiejer wuuertj vanoeten evangelischen hook 't doon van maogdjelikheidsgelofdjes aangemeujig, womit me belaof mit gemeinsjap te wachte toet 't huwelik.

Óntmaogdjing[bewirk | brón bewèrke]

De ieëste geslechsgemeinsjap, ouch waal kórtewaeg "d'n ieëste kieër", is ouch de óntmaogdjing (defloratie). Dees term wuuertj veur zowaal manskaerelen es vrólje gebroek. Zowaal vriewillige es ónvriewillige penetratie vanne penis inne vagina waeren es óntmaogdjing gezeen.

Tródsdet d'n ieëste kieër es hieël biezunjer wuuertj gezeen, wuuertj deze meistes neet es hieël fijn ervare. Neet allein haet eine vanne partners of allebei gein ervaring mit seks, ze zeen ouch nag seksueel opein ingespeeldj. Dore zieëne blief de opwinjing döks oet wodoor de vagina neet naat wuuertj of de penis neet zat stief, wodoor de penetratie lestig of pienlik verlöp.

De laeftied worop me de maogdjelikheid verluus versjiltj de geslech en de landj. Laeftieje loupe sterk oeterein van sómtieds slechs 11 of 12 toet (wied) baove de 30 jaor. Óngerzeuk is verrich gewaore nao 15-jäörige in 24 lenjer. Hie-oet zów blieke det 23,3% vanne Nederlandjse jónges en 20,5% vanne Nederlandjse maedjes gein maog mieër is. Nederlandj is hie-in geinszins de koplouper; det zeen Oekraïne veure jónges mit 47,1% en Ingelandj veure maedjes mit 39,9%. Achteraan staon Spanje bieje jónges mit 17,2% en Macedonië bieje maedjes mit 2,7%. 'n Óngerzeuk van UNICEF oet 2001 goof es rizzeltaot det in 10 vanne 12 óngerzóchdje lenjer mieër es twieë-derdje de maogdjelikheid haet verlaore veuren twintjigste verjäördig. Volges gemiddelgezien.nl is de gemiddeldje laeftied worop me wuuertj óntmaog veur Nederlenjers 16,7 jaor en guuef 't 'nen dalendjen trand (in 1980 waas dit nag 17,3 jaor). Volges KRO's De Wandeling is 2% vanne luuj baove de 30 jaor nag maog. Euveriges wuuertj euvere laeftied worop de óntmaogdjing plaatsvindj hieël regelmaesig gelaoge, zelfs in óngerzeuke, ómdet me zich in väöl óntwikkeldje lenjer d'rveur sjaamp pas laat te zeen óntmaog gewaore, dewiel me in traditioneel culture juus lever neet wiltj toegaeven al veur 't huwelik seks te höbbe gehadj. De betroewbaarheid van dees óngerzeuke blief hiedoor döks achter.

Maogdjelikheidsteste[bewirk | brón bewèrke]

Vrólje en maedjes waere sómtieds óngerwórpen aan maogdjelikheidsteste door häör femielje of (toekumstige) sjoeanfemielje, gegróndj oppe aannaam det maogdjelikheid sumpel kan waere aangetuuendj door 'nen dokter of zelfs door 'ne neet-medisch gesjoealdje persoean. Maogdjelikheid kan me medisch neet achterhaole, behauven es spraok is van verkrachting of van seksueel misbroek bie jóng kinjer, get det waal dudelike späör kan achterlaote.

In feite bestaon twieë teste, bei gegróndj op foutieve aanname:

  • 't Teste oppe aanwaezigheid van 'n óngesjónje maogdjevlees of hyme;
  • 't Teste vanne strakheid vanne vagina, door mieëder vingeren inne vagina te staeke. Döks wuuertj aangenómme det bie 'n maog 'ne vinger nag waal lök, meh twieë neet mieë. Wen dit waal 't val is wuuertj aangenómme det de vrouw dus gein maog mieër is.

Wiejer guuef 't ouch manskaerelen en femieljelede die de toekumstig broed "screene", eventueel mit behölp van 'ne privé-detectief. Deze kan óngerzeuk plieëge nao eventueel relaasjes in 't vergangene of bezeuk aan 'n kliniek veur 'n maogdjevleesherstèloperaasje.

De betroewbaarheid van dees vaginaal teste is nihil. E maogdjevlees kan aafwaezig zeen of al zeen ingesjäördj door neet-seksueel aktiviteite. Ouch de strakheid van 'n vagina is geine betroewbaren indicator; sómmige vrólje höbben eimaol kleinder en strakker vagina's es anger. Vagina's zeen elastisch en kónne zelfs nao 'n gebaordje weer aeve strak waeren es bieje ieëste gemeinsjap. Boetedet kónne ouch hie neet-seksueel aktiviteite wie sport de rèkbaarheid vanne vagina vergruuete. Toch gaeve sómmige dokters in islamitische lenjer certificate van maogdjelikheid aaf, wersjienlik veur de maedjes te besjurme of ómdet ze geldj d'rveur kriege.

De Britse regering leet immigrerendje vrólje 'n maogdjelikheidstes óngergaon inne veróngerstèlling det de verklaoringe van maogdje betroewbaarder wore. In 1979 publiceerdje de Guardian hie-euver worop de regering 't beleid haet aafgesjaf.

Maogdjelikheidsteste geljen es hieël controversieel en ónethisch. Vrólje en maedjes óngergaon dees teste döks taengen häöre wil en ónger zwaor sociaal drök en zeen 't es vernaederendj. De praktiek is in stried mit 't princiep van privacy en ónsjenjbaarheid van 't lief. Boetedet wuuertj 't feit det slechs vrólje en neet manskaerele hie-aan waeren óngerwórpe gezeen es hypokriet.

Maogdjelikheidsfraude[bewirk | brón bewèrke]

Ónger maogdjelikheidsfraude vèltj alles womit 'n vrouw of e maedje bewies van maogdjelikheid fabriceertj dewiel ze dit neet mieë is. Ómdet in väöl vel maogdjelikheid wuuertj aangenómme op controversieel argumente is 't meugelik det 'n vrouw t'n ónrch es neet-maog wuuertj bestempeldj en mót ze "bewies" fabricere. Dit kan ónger anger door:

  • Sjirurgische operaasjes die 't maogdjevlees herstèlle of de vagina strakker make;
  • 't Mitnömme van e flesjke blood oppe huweliksnach det euver 't lake wuuertj gegaote tiejes de gemeinsjap.

Zuuch ouch[bewirk | brón bewèrke]

Wiktionair
Wiktionair
Zeuk de definitie, vertalinge, oetsjpraok en dialekvariante van maog op in de Wiktionair.
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Maog&oldid=440284"