Levantiense Zieë
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
De Levantiense Zieë is de benaming veur 't oeëstelike deil van de Middellandse Zieë. De zieë wuuert begrens door Törkieje in 't noorde, Syrië, Libanon en Israel in 't oeëste en Egypte in 't zuje. De naam verwies nao de Levant, 'ne regio waovan ónder ander Syrië en Libanon deil oetmake. De wiechtigste revier die oétmond in de Leventiense Zieë is de Niel. Ten oeëste van de mónding van de Niel vörmp 't Suezkanaal de verbinding mit de Roeëj Zieë.
Kreta, en mier percies 't eilendje Gavdos, direk ten zuje van Kreta, vörmp de westelike begrenzing. Geliek heej leet 't deepste punt van de zieë (4.384 m). 't Groeëtste eiland in de zieë is Cyprus. 't Stökske ten noorde van Cyprus nump me ouk waal de Cilicische Zieë. De Golf van Antalya, Mersin en İskenderun aan de Törkse zuudkös zien ónderdeil van dit stök zieë. De kösstrook van 't Törkse vasteland is dichbevolk en veural de umgaeving van Antalya is populair beej toeriste, net as Cyprus, Rhodos en Kreta.
In 't verleje droog de zieë de naam Mare Aegyptum (Egyptische Zieë) en 't stök beej Syrië en Libanon hoot Mare Phoenicium (Fenicische Zieë).