Kindersjrik

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


'ne Kindersjrik is e fenomeen oet de volkscultuur, mie bepaold in volksverhaole. 't Is 'n figuur woevaan 't bestoon aon kinder weurt vertèld veur te veurkoume tot die oongewinsde dinger doen. Es e keend beveurbeeld neet nao bed wèlt of zien ete neet opit, zal de kindersjrik langskoume.

De in de Lieg Len meis veurkoumende kindersjrik is de boeba, in Noord-Limburg ouch wel beukèl geneump. Wie dee perceis oetzuut en wat 'r deit ligk neet vas, meh aofsjrikwekkend is 'r wel. Veur erger oongehoerzaamheid kinne awwers nog mèt de werewouf dreige. Wee bij 't water geit speule moot oetkieke veur de nekker of de haokemaan, 'ne geis dee diech 't water in trèk es 'r zin heet. In 't koreveld hojzde de korewouf, eigelek gewoen 'n hamster, woemèt gedreig woort. Nachbieste, wie de vleermoes en de uil, weure ouch gebruuk: dees bieste zien van hun eige al hendeg angswekkend. In de Sinterklaostied weurt ouch Zwarte Piet es kindersjrik gebruuk. Teslotte gief 't talloze variante, dèks in de vreemste vörm, wie de naaksluiper of de tienesnijer.

De kindersjrik is in bepaolde gevalle verwant aon of deil vaan 't volksgeluif. 't Kós veurkoume tot de awwers geiste en figure oet dat volksgeluif es kindersjrik gebruukde wienie ze zelf neet mie drin gluifde. Um dees rei waore awwer generaties folkloriste sterk geïntresseerd in de kindersjrik, boe-in ze 't lèste euverblijfsel vaan oeraw, mesjiens veurchristeleke (Germaanse) geluifstradities zaoge. Allewel tot 'n verbinding mèt de Germaanse gaode neet vèlt oet te slete, goon nuier generaties volkskundege devaan oet tot de tradities roontelum de kindersjrik neet zoe aajd zien.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Kindersjrik&oldid=358774"