Kilimanjaro

Van Wikipedia
Gank nao: navigatie, zeuke

Dit artikel is gesjreve in 't Sint-Joasters. 't Weurt gewaardeerd óm in dit artikel 't Sint-Joasters aan te hauwe of aan te gaeve welk anger dialek gebroek is.


Kilimanjaro.

De Kiliman(d)jaro is e vriestäöndj bergmassief van 60 bie 80 kilomaeter det is gevörmp door drie stratovólkane, gelaenge in de regio Kilimanjaro in 't naordoaste van Tanzanië, óngevièr 3 graoje t'n zuje van d'n aevener. De Kilimanjaro is de hógste berg van Afrika en kump daoveur in 't riejke van de zoageneumdje "zeuve tuup" veur. De berg stèk ruum vief kilomaeter oet baove zien ómgaeving en is daomit d'n hógste vriestäöndje berg oppe welt. De grótste en hógste vólkaan, de Kibo (5892 m), wuèrtj geflankeerdj door Shira (3962 m) en Mawenzi (5148 m).

Op de berg bevinje zich óngevièr 250 kratere. Eine van de grótste is de caldera baovenop Kibo, die 'n doorsnit haet van óngevièr 2,5 km. In die caldera bevindj zich de Reuschkrater, en dao-in ligk de recènste krater, d'n Ash-Pit. Op de zuudoastelike helling van Mawenzi völtj 't Chala-maer 'nen 3 km² groate krater.

Óngevièr 2 km² van Kibo is bedèk mit 'ne kleine gletsjer. Dezen ieskap waas anen ènj van d'n neugetièndjen ièf nag vief kièr zoa groat. 't Hógste puntj van de kraterrandj van Kibo wuèrtj Uhuru Peak geneump (uhuru is Swahili veur "vrieheid") en ligk 5,895 m baove de zièspegel. In 1889 vónje Hans Meyer en Ludwig Purtscheller mit häöre berggids Yohani Kinyali Lauwo 'n route nao d'n toep. In 1912 beklómme Fritz Klute en Edward Oehler d'n hógste Mawenzi-toep.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Kilimanjaro&oldid=382757"