Jos van Rey

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.


Jos van Rey (2018)

Jozef Franciscus Bernard (Jos) van Rey (Remunj, 15 april 1945) is 'ne Nederlandjsen óngernimmer en veurmalig politicus veure VVD. Hae waas veerteen jaor lang lid van de Tweede Kamer. Daonaeve maakde d'r deil oet van de Provinciaal Sjtate van Limburg. Ziene zetel in de Eerste Kamer (vanaaf 2011), aevenes dae es wèthajer in de gemeinte Remunj (vanaaf 1998), goof hae op 22 oktober 2012 op naodet inkel daag daoveur verdinkinge van corruptie taegen 'm wore gereze.

Laevesloup[bewirk | brón bewèrke]

De oet e sjlechtersgezin aafkómstige Van Rey volgde de mulo en de hbs, meh maakde bei opleijinge neet aaf. Later behaolde d'r e vakdiploma in de assurantië.

Hae richde 't nao zichzelf geneumde assurantiekantoor Jos van Rey op en deej in september 1974 zienen eerste politische sjteeg door in de gemeinteraod van Remunj zitting te numme. Hae deej dit veur de VVD, ómdet hae bezjwaor haj taege de groten invlood van de grótste partie, Katholiek Roermond, in 't lokaal besjtuur van de sjtad.

Hae waas tót 1986 raodslid en waas dit van 1990 tót 2002 oppernuuj. Tegeliekertied waas t'r ouch einigen tied wèthajer (1979 tót 1982), 'n polititische functie die d'r van 1998 tót 2012 weer vervölde. Zien portefeuille bevadde ikkenomische zake, volkshoesvesting en sjtadsóntwikkeling, personeel en organisatie en 't locobörgemeistersjap.

In 1982 zat t'r inkel maondje in de Provinciaal Sjtate van Limburg óm vanaaf april 1995 tót en mit 2012 oppernuuj in dees Sjtate zitting te höbbe. In 2003 veurde d'r es liestrèkker de provinciaal verkezinge veur Limburg aan.

Van 1982 tót 1998 zoot t'r mit 'n óngerbraeking van 1989 tót 1991 in de Tweede Kamer. Vanwaenge zien aopenhertigheid haolde d'r dök 't nuuds in de Limburgse gezètte. In 't nasjenaal parlement waas t'r veur zien fractie waordveurder veur volkshoesvesting, midden- en kleinbedrief en financië, en kwaam d'r op veur de belange van de provincie Limburg. Wiejer beklèdde d'r 't óngerveurzittersjap van de commissie van de parlementair enquête nao boewsubsidies (1986-1989) en vervölde d'r 'n rol van beteikenis in de kwestie van de zogeneumde technoleaseconstructie oet 1997, wobie d'r zich veural besjeftigde mit de wies worop de Tweede Kamer dao-euver waas geïnformeerd.

Zien tössetiedse aafwaezigheid in de Tweede Kamer (1989-1991) haj d'r te wiete aan opmirkinge die d'r in 't blaad van de liberaal jóngere (JOVD) haj geuut en die verkeerd ware gevalle. De veurkeursjtumme die d'r bie de Tweede Kamerverkezinge van 1989 in de wach sjleipde (13.000), ware neet zat veur 'ne zetel in de nuuj Tweede Kamer van toen.

In oktober 2018 woort bekèndj dat Van Rey zich haj aangesjlaote bie 50PLUS.[1]

Culturele invlood[bewirk | brón bewèrke]

Op 30 augustus 2015 veurde men in Valkeberg 'ne opera op gebaseerd op de affair. 't Werk waas e pastiche mit versjillende aria's, duètte en instrumentaal sjtökker van bekènde componiste en hètde El Rey ('de keuning').[2]

Rifferensies[bewirk | brón bewèrke]

  1. Nu.nl - Veroordeelde politicus Jos van Rey lid geworden van 50PLUS
  2. Openluchttheater Valkenburg - Opera 2.0 met El Rey
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Jos_van_Rey&oldid=429511"